Griaß Eich!

I sog`s Eich. Mia langt`s. Füa de nächstn Wochan is`s wieda aus mid da Gmiatlichkeit in unsra guadn Stubn vo Rosnhoam – am Max-Josefs-Blotz.
Mei Taubn-Spetzi – da Beni -hod`s a nimma ausghoidn. Ear ist gestern dann spontan in Urlaub gflogn. 
Weid is a zwar ned kema. Dafür is der ja vui z`schwar und z`faul. Er hogt jetzt im Dannabam vo de zowa Damen vo Innpuls.me obn. Und do wui er a erst a moi bleim, hod a ma grod gsogt.
Vo wos uns langt? Vo dem Foikn-Gschwerl. Des hod jetzt wieda kürzle sei Ferienwohnung im Kirchturm vo St. Nikolaus mitten auf`n Max-Josefs-Blot bezogn. Bsondas da Herr Foik buid se ei, ear war wos ganz Bsondas. Dea Lackl dea bläde.
I wos scho, ma soid ned schlecht üba andere red`n…aber na, den dapackn mia Taubn einfach ned. Der is nuar auf Ärga aus, jogdt uns, gibt andauernd mit seine Flugkünst und seim guadn Ausseng oo.
Leida kimmt der mit sein Aufgeplustere a no mächtig gut bei Eich Menschn o. 
Der hod sogar sei eigene Webcam. Is oiso quasi a Influencer und losst se de ganze Zeit dabei beobachtn, wos ear und sei Familie Dog und Nacht so dean.
I find des ja jetzt ned so aufregnt, ab anscheinend Ihr ja schoo, wos de Klickzahln ogäht. Fressn, Schlafa, Fliagn und Oar ausbriatn. Des war`s dann a schoo. Mera kennan de ned. 
Do bin i doch so vui spannender. I hob`s schließle sogar zu meiner eigenen Wochnkolummne brocht. Des schaffan die Foikn garantiert ned. Wei schreibn und lesn kennan de nämlich bestimmt ned. 
Aba wois soid`s. Aufregn huift nix. Jetzt`hoast hoid wieda obwartn, bis die ehrenwerte Familie wieda den Abflug macht. Und bis dohi bleib i jetzt hoid a im Gartn vo de Innpuls.me-Damen-
De zwa Damen schaun jetzt zwar ned recht begeistert aus. I und da Beni zam dadn auf Daua a bisserl vui redn, ham`s gmoant. Aba do miasn`s jetzt durch. Mia bleim. Basta!
So- und jetzt hock i mi zum Beni dazu auf`n Dannabam und schimpf a bisserl weida. 

Bis zum nächstn Moi
Eire Roselinde