Griaß Eich!

Und? Wia war de Woch bei Eich? Seid`s Ihr aa in den April gschickt wordn?
I leida scho. Mei besta Taubn-Spetzi, da Beni, hod`s tatsächle gschafft. Dabei ist der eigentle gar ned so hell in da Birn. Er hod mia gsogt, dass in an Supermarkt in Stephanskirchen a Lasta aus Versehn statt Schoko-Osterhosn obglafane Lebkuacha gliefert hod. Und da Supermarkt-Chef hädad  den Karton dann vor lauda Wuad glei amoi draußn in a Eckn pfeffat. So kräftig, dass a boar Schachtln aufplatzt san und die Lebkucha  verstraht aufn Parkplotz rumliegn soiadn.
Ihr wisst`s ja, wie gern i Lebkucha-Brässl mog. Oiso hob i ois liegn und steh lossn und bin sofort nach Stephanskirchn gflogn. Scho a ganz scheene Streckn, sog I Eich. Bin ja schließle a nimma de Jüngste.
A guade Stund hob i rumgsuacht nach de Brässl. So a freche Spotzn-Bande hod mi dabei beobacht und die ganze Zeit frech glacht. „Wos lacht`s ihr so bläd“, hob I dee dann irgendwann gfrogt und dann ham`s laut gruafa: „Aprui, Aprui“.
Da Beni hod de Sauband ogheiat – für an Tipp, wos aktuell bsondas guade Rengwürma gibt.  Seid dem bin i auf`n Beni ned so guad zum Sprecha. Kennt`s eich ja vorstain. Bei Lebkuacha-Brässl kenn i koan Spaß.
Aba egal, jetzt verot i Eich no an Aprilscherz, der de zwoa Damen vo Innpuls.me am 1. April zu schaffa gmacht hod. Dro beteiligt war a Wuidmaus. De ham de Katzn vor guad zwoa Wocha hoambrocht und weil des Mausal die Innpuls.me-Damen dabarmt hod, ham`s es zur Erholung in an großn Käfig ghockt mit vui Leckereien, Stroh und ana Luxus-Wohnung. Hod a so ausgschaut, als dads dera Wuidmaus do drin ganz guad gfuin.
Ausgmacht war, dass die Maus dann noch den neierlichen Wintereinbruch  wieda in de Freiheit entlassen weard – aba daraus weard jetzt nix mehr.
Wei de Maus hod se quasi scho seiba entlassn – passend zum am 1. April. Do hod des kloane, raffinierte Viecharl es irgendwie gschafft, die Klappn zum Käfig seiba aufzubringa und dann is auf große Erkundungstour durchs Wohnzimma spaziert. Die Damen vo Innpuls.me ham`s dabei erwischt und ham dann eanane Männa im Haus um Huif beim Eifanga gebetn.
Koana hod reagiert. Warum? Ja, wei de denkt ham, dass des garantiert a wieda a Aprilscherz ist. So konn´s geh.

Bis zum nächsten Moi
Eire Roselinde