Griaß Eich liabe Leid!

Und wie is `s Eich  jetzt gestan eagang. Seits ihr in den April gschickt wordn oda hobt epaa dorthin gschickt?
Oiso i bin wieda amoi mein bestn Taubn-Spezi, den Beni, aufm Leim ganga. Der hod ma eazählt, dass ètz aa zua Ostan Lebkuacha aufn Max-Josefs-Blot vakafft warn, und de fuada i doch so gern.  Oiso bin i do glei higlfogn – natürle umsonst und da Beni, der Batzi, hod se voa Lacha gar nimma eikrieagt.
So is des hoid med de Aprilscherz. Do weard gflunkat und glong. 
Aba i und die zwoa anderen Damen von Innpul.me ham ebenfalls gestan ganz schne vui Leid in den April gschickt. Mia ham geschriebn, dass aus Karstadt in Rosenhoam „Welleria Kraulstadt“ weard.  Natürle stimmt des ned. Heid sogt ma zu soichana Meldung, des war a „Fake-News“. 
Und genau do liegt des Problem. „Fake-News“ san ja heid quasi scho an da Tagesordnung. Wia soid jettz do no da traditionelle Aprilscherz raustecha?
Gar ned so einfach und darum ham gestan ganz sche vui Medien lieaba darüber gschriebn, dass da Aprilscherz in da Krise steckt ois dass se se  traut ham, no seiba oan zu macha.
Weil do eckt ma nämlich imma irgendwo o, des ham mia gestan scho a gspannt. Ganz vui ham glacht, aba a paar ham gschriebn, des kannt ma doch ned macha in a Zeit, wo Karstadt in so oana tiefn Krise steckt. 
Kannt oiso tatsächlich schwierig wearn für den Aprilscherz, wei Krisn gibt´s mittlerweile so vui und auf Kostn vo irgendwm geht a Scherz hoid imma irgendwie.
Darum weard dann a in dene Bericht über den Niedagang da Scherzkultur a Psychologe zitiert, der se scho ganz sicha is, dass da Aprilscherz üba kurz oda lang verschwindn weard.

Aba oans kon i Eich jetzt an dera Stei versprecha – bei uns auf Innpuls.me verschwindt da Aprilscherz ned, wei wia hod da Ringelnatz a moi so treffend gmoant: „Humor ia da Knopf, der verhindat, dass uns da Kragn platzt“ oda nach Valentin: „I grei mi, wenn`s regnet, denn wenn i mi ned gfrei, regnet`s  auch“.
I dem Sinne – schau ma moi, wos uns im nächstn Jahr für Eich eifoid und ob ihr uns dann wieda auf`n  Leim gehts“

Bis zum nächstn Moi
Eire Roselinde