Griaß Eich!

Da Winta kannt koid wearn. Des is ètz nix Neis. Aba dess Joar kannt`s so richtig koid und ungmiatlich warn. Nämle dann, wenn des eitritt, wos mia aktuell täglich lesn und hearn.
Zu Beginn vo dera Corona-Pandemie hams Kloopapier ghamstert. ètz gäd`s um`s Hoiz.
Jeda konn se aba jetzt ned vo oan Dog auf den andan an Hoizofa in sei Wohnung einbaun. Moi davo abgseng, dass ja Leid gibt, de de Art vo Hoazn so gar ned füa guad hoasn, weils schädlich sei soi füa unsa Klima.
Oiso wos doa in da Not!
Dazu erreichn uns bei Innpuls.me derzeit jeden Dog neie Vorschläg: Mehra rumhupfa in da Wohnung, koid duschn und lieaba amoi öfta a Trocknschampoo füa de Haar  hernehma.
So richtig ofreindn hob i mi bis jetzt no mit nix kena. Aba heid ist a do a Pressemitteilung von an Reiseveranstoida auf unsan Disch glfattert – de hod wos. Des Motto lautet „Reisen statt heizen“ – oiso „Roasn statt hoazn auf boarisch!“. Weida hoasts auf hochdeitsch in dem Mail: „Mit einer Fernwärme Aktion erhalten Gäste in Marokko und Tunesien ab zwei Monate Aufenthalt attraktive Rabatte auf Übernachtungspreise und Wellnessanwendungen“.

Des los i jetzt amoi im orginal Wortlaut so steh. Super Sach, oda? Jetzt miast`s ihr nur no schaun, dass ihr 60 Dog Urlaub kriagts oda dass eia Chef Eich earlaubt, dass ihr Homeoffice in Marokko oder Tunesien macha dearf`s. Dann kennt`s ihr da Kältn bei Eich dahoam entfliehn, miasts nimma ständig auf de Energiekostn achtn und gleichzeitig dead`s a no wos guads für eia Land.

Wer woas – viellicht kriagt`s dafüa amoi sogar an Ordn verliehn.
Oiso –  I überleg mia des jetzt echt. Muas nua no meine zwoa Kolleginnen voa Innpuls.me überzeugn. Ko ned so schwaar sei. Friara häd i gsogt, i mecht in den Urlaub geh – jetzt` ko i sogn, I muas in den Urlaub geh – oiso quasi ois Opfa fua unsa liabs Vaterland. Is glei ganz wos andas, oda? Do denkt dann a koana mea an de Umweltschädlichkeit vo de Fliaga am Himme drom.
Urlaub zua Rettung da Weid – des gfoid ma!

I wünsch Eich wos – vielleicht drefa ma uns ja scho boid amoi in Marokko oda Tunesien beim Homeoffice im Spa.
Bis boid
Eire Roselinde