Griaß Eich!

Eeast amoi wünsch i Eich natürle aa a gsegnets Ostafest.
Gfuit is des ja da Dog vo de Hosn und de Henan Schliaßlich woass doch jeds Kind, dass de Henan fia de Oarprodukton zuaständig san und de Ostahosn de Oar dann bemoin und ausliefern. Ohne Hena und Hosn koa Ostan! Oda?
….so a Schmarrn. 
In Wirklichkeit  is des ganz anders. Do gibt`s nebn de Hosn und Henan no andere wichtige Viecha. Ohne de dat in Sachn Ostaoarproduktion überhaupt nix lafa. 
Wer des sei soid?
..Ja I. Oiso mia Taubn. 
Do eazähl i Eich ètz amoi wos: Ostahosn wearn nur vo Eich so unglauble fleißig dargstäit. Dabei san`s faule Bazis, de`s faustdick hinta eanane Leffen ham. Wenn de an Weg findn, de Arbad umgeh zu kenne, dann machan`s des aa.
Und dann laffd des foigendermaßn ob. De Henan produzieren und produzieren. Aba bei de Ostahosn gäd nix weida. 
In so an Foi engagieren de Hehna dann uns Taubn. Weil mia san ja bekannt dafia, das mia de Post zuverlässig zustain. In dem Foi is des dann imma a Briaf vom Obahuhn. Darin droht es de Hosn wieda amoi o, dass de Bezahlung gekürzt weard. Bei Ostahosn bestäht de natürle aus Gejberübn.
Do soiads amoi seng, wia schnei die Hoppla dann wieda munta wearn. 
Jetzt wisst`s, wems ia eigente Eire bundn Ostaoar zua vadanga habt`s – Tuns Taubn. 
Des glabt`s ia ned?
Mei, miast`s ja ja ned. Aba in unsare Geschichtsbiacha stäht des so. 

Bis zum nächstn Moi
Eire Roselinde