Griaß Euch!

Wia habts den Ihr so de Weihnochtsfeiadog überstandn? Is scho a ganz schee hart des Weihnachtsfest, oda?
3 Dog feian und 3 Dog quasi rund um de Uha essn…Mei, bin i voigfressn.
Würstl, Schweinsbron und a fette Andn san natürle füa mi ois Vegetariarin nix, aba leida gibts hoid an Weihnachtn a no vui andere guade Sachan. Am erstn Dog hob i mi mit Kartoffesalod, frische Semmen und Brezn voistopft. Am zwoatn Dog hods dann Semmeknedln gem. Mei de schmackan mia ois boarische Stoddaum natürle a. Und heid is bei uns da Reste-Dog ausgruafa woan – des bedeit, ois wos no vo de zwoa vorausgangana Dog di is, muas jetzt aufgfuadad wearn.
Des bedeid konkret. Da Kartoffesalod is zwar scho weg, aba dafür gibts no jede Menge Semmen, Brezn, Semmeknedl und vor oim Platzal und Lebkucha bis zum Obwinkn.
Wei, de san in de veagangana Dog ned weniga woan, sondan sogar no mehra. Fast jeda Bsuach hod uns dann ja no seine Platzl zum Probiern vorbeibrocht hod. Do kon ma natürle ned Na sogn. War ja unhöflich.
Und ihr wiast ja scho, dass i Lebkuchabräsl bsondas gearn mog.
Aba irgendwann ist dann a bei mia Schluss. Do gäht nix mehr eini.
Schee langsam kon i a koane Lebkucha mea seng und des mog wos hoasn.
Gut, wenn jetzt dann des neie Joar kimmt mit seine guadn Vorsätz. I nimm ma dann weniga zu essn – wie jeds Joahr. Und des schaffe ia immer. Kennts ma glam.
Zumindest am Neujoarsdog – wei do bin i in da Regl dann a wieda ganz schee satt.

Bis demnächst
Eire Roselinde