Griaß Eich liabe Leid!

Seit Togn beschäftign si de Medienweid mid mysteriöse Flugobjekt, de am US-Himme drom gseng und obgschossn wearn. Wea steckt jetzt do dahinta? Ja do frogt ma se. Aba jetzad scheint ma ja die Antwort gfundn zum hob: Alians sans, oiso Wesn vo am andan Stern. 

Auf olle Fälle titeltFocus.de und a no etliche andere Online-Zeitunga so: „Steckan Aliens hinta dene Flugobjekt?“ Und jetzt kimmt`s. So a Obahaupt vom US-Militär soi auf de Fragn gantwort ham, dass ma des auf olle Fälle no ned ausschliasn ko. Oiso, a klares Na heard se für mi andas o. 
Und jetztad ward natürle auf de sozialn Netzwerk scho darüber aufgregt diskutiert, ob jetzt de Invasion vo de Außerirdischn ogfanga hod und ob`s jetzt ned endle Zeit weard, an Aluhuat zu bastln.

I verstäh jetzt die ganze Aufregung do ned. Wei  – für mi is äh klar, de Aliens de san do scho längst unta uns. Jetzt schaut`s Eich doch noa a moi Eire Mitmenschn genaua o oda no bessa den oana oda andan Filmstar. 
Und i mecht jetzt a nix verschrein, aba so mancha Politika wirkt jetzt scho aa so, als dada vo an andan Stern kimma, oda? 

Interessanta ois de Frog, ob jetzt de Aliens do san, find i, warum de jetzt agrad bei uns auf da Erdn gland san. Do gibt`s doch sicha irgendwo im Wäidoi andere Planetn, wos a weng scheena und friedlicha is, wia bei uns!?
Aba guad, i kos a wieda vasteh, de Marsiana und Co. Gibt hoid doch a vui scheens bei uns, grod a bei uns in Bayern. Oiso wenn i so a Außairdischa war, dann dat i ned in Amerika landn, sondan bei uns in Rosnhoam. Drum bin i mir ganz sicha, dass groß do so mancha Alien scho lang okemma is. Jetzt is an Eich, schaut`s Eich a moi um. Vielleicht stäht scho oana neibe Eich. 
Und wenn`s Ihr seiba a Alien seids, dann schreibt`s uns des – wei auf so a exklusive Geschicht wartn mia scho lang.

Bis zum nächstn Moi
Eire Roselinde