Griaß Eich liabe Leid!

Dass ihr ma heid ja olle glücklich seid. Immerhin is ja heid am 20. März da Wäidglücksdog – und des is a beschlossene Sach. Um gnau zua sei, is da Wäidglücksdog am 28. Juni 2012 vo da UN-Hauptversammlung beschlossn woarn. 
Des Massl -oiso für de Preissn unta eich, des is Glück auf Boarisch – is damit sogar zu oana poltischn Angelegenheit woarn. 
Do stäid si fia mia aba ètz de Frog, wos Massl eigentle is.
Und do ge´ngan de Meinunga ganz schee weid auseinanda. I hob zum Beischbui heid scho vui Massl kabd: Im Kirchturm vo St. Nikolaus san gestan wieda de ogebarischn Turmfoikn eizong. Beinah hättn`s mi gseng, wia i do om mit mein bestn Taubnspezi, dem Beni, obghengt bin und de Leid untn auf`n Max-Josefs-Plotz boobacht hob. Aba ebn nua beinah – des war a Massl, wei ansonstn´n hed`s wieda an riesn Ärga mit dene Turmfoikn gebn.
Wos brauch i jetzt no ois zum glücklich sei. Mei, eigentle gar ned so vui. Gejd brauch i ois Stodttaubn ned. Wia Ihr ja jetzt scho wisst`s gfrei i mi im Winta bsonda üba Lebkuachabräsl und im Somma üba de Brässl von Lebakassemmeln. So a Schlückal Bia is für mia ois boarische Taubn natürle a nia verkehrt. Mia gfoit in da Fria a erfrischends Bod in a Pfützn und wenn i dann auf da Nocht obn auf an Doch sitz und de Sonn untageh sich, dann is de Weid für mi schee. 
Des Wort „Glück“ kimmt übrigens vom mittelniedadeitschn Wort „Gelucke“ und des bedeit so vui wia „Gelinga“ und des hod wos mit „leicht“ zum doa. Ob Viech oda Mensch – koana plogt si hoid gern. 
Aba komisch is dann wiedarum, warum a Leid mit ganz vui Gejd, die nia mehr arbadn miass, aa ned olle glücklich san. Is scho aa a komische Sach mit dem Glück. 
In Finnland san übrigns laut am jährlich eascheinendn Wäidglücksbericht de Menschn am glücklichsdn, vo de Taubn woas i des jetzt ned. Deitschland kimmt  auf Rang 16 – zwoa Plätz schlechta ois im Vorjahr. 
Aba auf so a Umfrage geb i ned vui. Glück ist imma no a persönlichs Gfui – des braucht und konn ma koana vorgebn. Und i dua heid ois dafür, dass glückle bin und des rat i Eich aa.

Bis zum nächstn Moi
Eire Roselinde