Griaß Eich liabe Leid!

„Liabe Roselinde. Soichane Taubn wia Di, so schlau und schee, bräuchdn mia mehr. Du bist de beste Taubn vo ganz Bayern, ja wos sog i, vo da ganzn Wäid“!.
Mei heard se des supa o. So al Lobhodelei duad scho a moi ganz guad. Wei eigentle kriag i ois Ogstäite bei an Presse-Portal ja meistens nuar Kritik. Do geht`s mia so wia de Politka. Entweda schimpfan mi meine zwoa Kolleginnen, wenn i amoi wieda lieba Lebkucha fuadat ois arbat oda a Lesa regt si auf, wei a an Fehla in an Artikel gfundn hod und des kimma ja leida imma wieda amoi vor.

Wear mi jetzt so üba den Schellenkini globt hod? Mei, des is jetzt die Frog, so wia beim Hubsi Aiwanger vo de Freien Wähler hoid a. Bei dem is so a Lob-Tweet auf Twitta allerdings ganz schee schiaf ganga. Do schreibn jetzt olle Nachrichtn drüba. Is da Aiwanger globt woarn oda hod a si vieleicht seiba globt? Des is die große Frog de bleibt.
I wui mi jetzt do an de Spekulationen ned beteilign. Ko sei, ko ned sei. Vielleicht find ma`s ja no raus.
In mein Foi konn i Eich aba sogn, des duat scho guad, moi so vui Lob zu lesen, egal vo wem des jetzt a kemma is.
Aba wenn i jetzt so nachdeng, häd`s des bei mia gar ned braucht. I woas ja schließle seiba, dass i guad bin.

Bis zum nächsten Moi
Eire Roselinde