Rosenheim – De Roselinde hod a Zuschrift erreicht, in der a Lesa ogmerkt hod, dass mia auf Innpuls.me an foischn Begriff verwendn. Ma deafad ned Wiesn schreim, sondan Voiksfest oda Herbstfest, weil des Fest schließle ned auf oana Wiesn stattfindn dat. Drum erklärt de Roselinde, warum mia in Rosnhoam vo da Wiesn sprechan, wenn mia des Herbstfest moanan. Hoid, Herbstfest is ja a ned richtig, hod heid oane unsra Leserinnen uns gschriebn…. 

Griaß Eich liabe Leid!

Mia in Rosnhoam sogn, wenn ma auf`s Voiksfest gengan: „Auf geht`s zua Wiesn!“. Und des scho seit imma. Füa Zugroaste oda Touris is des jetzt vielleicht ned so guad zum versteh, weil unsa Voiksfest ja auf an Plotz stattfind, der untam Joahr nix andas is ois a großa Parkplotz.
Oiso miastn mia ja richtigerweis sogn: „Auf geht`s zum Parkplotz!“. Aber des heart se hoid dann ned so schee o. Und wenn ma do dann ja no weida denkt, miasat ma ja ano de Loretowiesn, auf dera unsa Voiksfest stattfind, umdafa in Loretoparkplotz. Aba des wui ma hoid an ned. Loretowiesn heart se einfach so vui bessa o und jetzt kimmt`s – so foisch is des a ned – wei in da Vagangaheit war der Plotz amoi tatsächle aa scheene große Wiesn. I hob Eich dazu aa a Beweisfoto im Archiv vom Herbert Borrmann gsuacht , aufgnomma im Joar 1954 mit dem Kapuzinaklosta im Hintagrund! Bittschee:

Jahrmärkt hod`s ürigens auf da Loretowiese scho im Mittelalta  gebn. Und des jährliche Herbstfest find do bereits seid 1861 statt.
Und do hob i jetzt wieda an Ausdruck hergnoma, zudem uns heid a weitare Zuschrift erreicht hod von oana unsra  Leserinnen aus ganz obn im Nordn. Es sei scho a weng seltsam bei uns in Bayan, dass mia a Herbstfest im August veranstaln und glei danoch des Oktobafest in Minga im Septemba. Ob denn bei uns in Bayan de Uhrn andas lafa dadn, hod`s uns grogt.
Mei, do konn i nua auf boarisch sogn: „Wea Ko der ko“.

Nix füa unguad
Eire Roselinde