Do bin i wieda liabe Leid!

Noch unsam Waschkorbgebäck kemman jetzt die Vanillekipflerl. Die stengan ja auf da Beliebtheitsskala bei vui Menschn ganz weit obn.
Wer de jetzt erfundn hod, do gibt`s wia füa vui andere Sachan ja, mehrare Möglichkeitn. Manche moanan, dass Wiener Bäcker aus Freid über die Befreiung vo eanana Stodt von da Türknbelagerung de Kipferl zum erstn moi bacha ham. Da Halbmond soiad an die türkische Flaggn erinnern.
Das mit da Vanille ist dann a andere Sach. De war friara ganz schee deia und drum nur wos für an Kini. Aba dann is an Chemika 1874 gelunga, dass er des Vanillin künstlich hod herstain kenna.
Mia heid kennan uns jetzt überlegn, ob ma a echte Vanilleschotn her neman oda an Vanillezucka.

Oiso uns is da Vanillezucka liaba, aba ihr kennt`s ja a für unsa Rezept aa a Schotn auskratzn.

No a wichtiger Tipp für unsere Vanille-Kipferl: Des guade ist, dass de Kipfler ohne großn Aufwand guad gelingan, wenn ma sie erstens noch dem bacha kurz abkühln lost, bevor mas dann im Zucker wälzt. Ansonsten dabrässlns, wos mia ois Taubn ja grod recht is, aba Eich vielleicht ned so guad gfuid.
Und  wear liaba kloane, schlanke Kipferl mecht, muas des hoid a beim Forma beachtn.

Innpuls-me – Vanillekipferl:

De Zuatadn:

• 200 g Mehl
• 50 g Speisesträke
• 200 g kalte Butter
• 1 Eigelb (Größe M)
• 125 gemahlene Mandeln ohne Haut
• 100 g und 200 g Zucker
• 2 Vanilleschoten oder 2 Päckchen Vanillezucker
• Backpaper

Und so macht ma`s:

Mey, Stärkn, Butta in Stückaln, Oargelb, gmoine Mandeln und 100 Gramm Zucka erst amoi mit dem Knethakn vom Handrührgerät oda da Küchamaschin kneten und dann a no mit de Händ. Danach um de 30 Minuten koid stein.
Vanilleschotn auskratzn und des Mark mit dem Zucka vermischn. Ode ebn den Vanillezucker einerührn.
Aus dem Doag rollts ihr dann Stanga und daraus schneid`s dann klane Stückal ob. Die formts ihr zu de typischen Kipferl. Aufpassn: de gengan ganz schee ausanand.
Auf a Backblech legn und a auf Absand achten und dann um die 175 Grod bacha. Die Kipferl brauchan so um die 10 Minutn. Aba liaba ma öfta nochschaun. Ko plötzle schnei geh und dann san die Vanillekipferl braun und nimma schee.
Am Schluss die no warma Kipferl im Zucker wälzn. Des war`s

Guad gelinga wünscht 
de Roselinde

Und do geht`s zu unsam Backtipp Nr. 1: