Griaß Eich liabe Leid!

Wahrscheinlich sitzt ihr ètz scho bei Kaffä und Kuacha. Bei mir mia werd des heid nix. Bin nämlich grod east aufstandn.
Bei uns in Rosenhoam gibt`s nämle ned grod Friahling, Summa, Heabsd und Winta. Mia ham aa no a fünfte Joareszeid – di Wiesn. De dauat 16 Dog und während dea Zeid schaut ma gern amoi zua diiaf in den Maßgruag eini.
Gnau des is mia und mein bestn Taubnspetzi, dem Beni, gestern passiert. Mia ham quasi ned nua zu diaf in den Maßgruag eingeschaut, sondern san glei ganz dringhockt.
Gemeinsam dringa, feian und singa is hoid einfach a moads Gaudi – glei gor nach zwoa Joahr Pause. Natürle losst ma`s do dann glei amoi bsondas kracha.
Ehrlich gsogt, konn i mi a gar nimma so genau erinnern, wos i eigente ois do hob.
Nur so vui. Erst amoi bin i mit da Geistabo gfarn. Dann no mit dem Kettnkarusei und dem Riesenradl. Des gehört hoid oafach dazua. Dann woid i a no in dem Gladiator eisteign, dem neia Fahrgschäft. Des soi ja a ganz bsondara Nervenkitzl sei. Is a tatsächlich ganz schee hoch. Des macht uns Taubn natürle überhaupt nix aus. Dass se der Gladiator dann aber a no ständig üba Kopf draht, hod an Beni gar ned gfoin. Und do hod des Unheil dann für mi ogfangt. Weil i den Beni ausglacht hob, hod er mi zu an Wettkampf herausgfordert: Noagl zamsaufa. Er hod gmoant, wenn i mehr Noagl schaff wia ea, dann würd ea mit mia den Gladiator fahrn.
Des hob i dann a geschafft, aba dann woid i den Gladiator liaba nimma fahrn. I glab, der Beni hod mi do reiglegt, der Batzi. Aba die Wiesn dauat ja no a weng und do wearn ma dann scho schaun, wer ois letzta lacht.

Bis zum nächstn Moi
Eire Roselinde