Neues von der Roselinde: Auf der Suche nach einem „woken“ Faschingskostüm
Griaß Eich liabe Leid!
Bei uns in Rosnhoam steigt heid auf dem Max-Josefs-Plotz no a große Faschingsparty. Eh klar, dass i do dabei sei weard. Etzad kimmts nur no auf des o, ois wos I mi heia verkleid..
Mei, wos i scho ois in da Vergangenheit war. Ois is möglich! Oda bessa gsogt – ois war möglich – heid is des mit da Kostümierung nämlich gar nimma so einfach.
Beispuisweis hob i mi friara gern amoi ois so a Politika verkleidet. Des war imma lustig. Aba heidzudog is des schwar woarn. Wei damit eckt ma hoid imma irgendwo auf de oane oda andre Seidn o. Und überhaupt is da bei da aktuelln politischn Lage des Lacha vaganga, find i.
Des weard oiso scho amoi nix.
Mei, dann kannt i hoid auf de bekanntn Klassika zruckgreifa. Dafür find se in mein Klamottn-Fundos vui….Ab hoid!!! – des kannt ja a Problem gebn!!! Im Intanet hob i gestan a Schreibn vo dem „Institut für Situationsansatz“ gfundn, kurz „ista“
Dene gehts drum, dass die Kinda möglichst diskriminierungsfrei aufwachsn. Und dazu hamse se dann scho im Joar 2016 a wos zum Fasching eivoin lossn. „!Fasching vorurteilsbewusst feiern -Anregungen für eine diskriminierungssensible Praxis“ hoast da Titel.
Mei, i wui jetztad gar ned genau drauf eigeh, wos do drin stäht – kurz zsamgfasst: Es hoast jetzt nimma, erlaubt is wos gfoid – sondern erlaubt is, worüber se überhaupt koana aufregn ko.
Und do wards dann eng. India….hoid,, nach dem Schreibn muas des jetzt „Amerikanische Erstbewohner_innen“ hoasn., geht gar ned.
De andan Klassika, wia beispuisweis Polizist, Cowboy, Prinessin oder no schlimma Hex, genauso weng. Da Rat des Instituts: Liabe erst o moi mit de Kinda üba den Fasching diskutiern.
Ja, des macht aus deran Sicht dann scho Sinn. Wenn ma nämlich lang genug diskutiert, is da Fsching dann a scho glafa und damit is dann a des Problem mit dem Kostüm erledigt.
Jetzt kannt i an Trend aufgreifa – des war heia de Barbie!… Aba hoid… des is a wieda foisch. Wei, wenn i ois Taubndame an Barbie deng, ist des a scho wieda für heidige woke Verhältnisse vui zu unkompliziert. Do miasat i dann scho eha als Ken geh, der se aba in sein Innersten eha als Barbie fühlt.
Mei, ist des schwar woarn mit dem Faschings. Wos sois. Dann verkleid i mi hoid ois i seibst. Wei damit kimm i ma sowieso imma mear wia a Ausairdischa voar. 😅👽
Na dann, mia seng uns späda aufn Max-Josefs-Platz
Bis zum naxtn Moi
Eire Roselinde
