Wochenrückblick der Roselinde

Wochenrückblick der Roselinde

von | 13. März 2022 | Heimat, Pinnwand

Griaß Eich!

Mei, ist des a scheens Weda zua Zeid!  De Sonna scheint und warm werds schee langsam a draußn.
Bei uns in Rosenhoam fangt damit jetz wieda de Zeit o, wo ma vui Zeit aufn Max-Josefs-Blotz verbringt. Warum? Ja mei, wei ma do Leid schaun koo. 
Do hod de Corona-Krise sogor a moi wos guad`s bewirkt. Die Sitzmöglichkeiten im Freien san seitdem deitlich mehra worn und gengan jetzt a weida in den Blot eini.
Des hod an Vorteil. ètz konn ma, wenn ma do vor am Wirtshaus gmiatlich Brotzzeit macht oda an Kafä trinkt, no bessa seng, wer do olla vorbei marschiert.  Und irgendwann kiamt do ja jeda Rosnheima a moi vorbei.
Gseng und Gseng wearn lautet de Devise. Do siecht ma dann, wer üba de Winterzeid a bisserl zvui  Speck ogsetzt hod, oda wear a neie Frisur oda glei gar an nei Partna hod. 
Und natürle tauscht ma derartige Eakenntnisse  a glei mid de nächstn Passantn aus. 
Ma kannt oiso a song, dass da Max-Josefs-Blotz de Gerüchteküch da Stodt ist. Neigikeitn verbreitn se do unglauble schnei. 
Klar, dass a i do jetzt wieda vui Zeit verbringa und mi do umhearn und umschaun weard.
Ohne mi hättn die zwoa Damen von Innpuls.me sonst doch nix mear zum schreibn. Außerdem foin do oiwei irgndwelche guadn Bräsl füa mi ob.
Drum mache i mi jetzt glei wieda aufn Weg zum Max-Josefs Platz- mei besta Taubnspezi, da Benni, ward dort scho auf mi.
Vielleicht treffan mia uns ja a amoi dort. Aba passts guad auf, wos ihr do deards oda sogst – wei geheim bleibt nix.

Bis zum nächsten Moi
Eire Roselinde

Wochenrückblick der Roselinde

Wochenrückblick der Roselinde

von | 6. März 2022 | Heimat, Pinnwand

Griaß Eich!

Es gibt ja Zeitn, do war i scho ganz schee gern a Mensch.
Hod ja scho so seine Vorteile, muas i song.
Die Damen kennan se mit hohe Schua und scheene Klamottn so richtig aufbrezln, Zum Essn gibts für Eich a deitlich mehr Auswoi wia fia uns gwöhnliche Stodttaubn.
Mei und dann kennts Ihr aa mid am Auto fahrn. So an kloana Flitza – am bestn a no in meina Lieblingsfarb Lila.
Aba bei den Spirtpreisn aktuell beneid ich Eich  jetzt glei a bissal weniga.
Unsa Nachbar is ja bekennender SUV-Fan. Macht hoid wos hear, sogd a gern. Aba gestern hod a dann amoi überlegt, ob a sei übergroße Garage ned in an Stoi umwandln soiad. Immerhin war ja so a Roß doch mittlerweile deitlich günstiga im Unterhalt und auffoin dad ma damit bei der Aufreiß-Tour durch de Stod schließle a.
Und unsa andera Nachbar fahrt heid scho wieda moi zum Wandern nach Östareich rüba. Des macht der jetzt praktisch mindestens jede Wocha oamoi.
Hod mi erst gwundat, wei bisher ist der ja mit seine Spetzl zam imma nua gern vorm Haus beim Bierdringa rumghockt. Aba aa de Art vo Sprit ist mittlerweile ganz schee deia gworn. Oiso gäd„s jetzt zum Wandern nach Östareich und nebenbei werd dann des Auto vuitankt – und med dem, wos a se dadurch spart, weard dann dahoam wieda Bier kafft, aba nur no für den Eignbedarf, hod a ma gsogt.
Do kennt`s jetzt ihr a moi neidig sei auf mi. Weil i hob schließlich Flügl . Ois Spirt reichan mia Keandl . Extra Schubkraft hoi i ma vo a Handvoi guade Kuchabräsl. Und des bissal Bier, wos i vadrog, gäd ètz aa ned ins Gejd.
Do ziagd `s Eich jetzt de Lädschna lang – oda?
Nix für unguad – mei, so a Taubenleben hod hoid aa seine Vorteile.
Und jetzt hob i dann glei a Verabredung mit mein besdn Taubnspetzl Beni. Mia woin heid no bei de Tankstäin vorbeifliegn und schaun, wia die Gsichtsfarb vo de Autofahrer wechselt, wenn sie seng, wos se am Schluss zoin miassn. Manche wean dann ganz weiß im Gsicht, andere wieda rot. Mia ham do a Wette am Laffa. Mehr varat i Eich jetzt ned.

Bis zum nächstn Moi
Eire Roselinde

Wochenrückblick der Roselinde

Wochenrückblick der Roselinde

von | 27. Feb. 2022 | Heimat

Griaß Eich!

Moagn ist Mondog, dann kimmt da Dienstag und dann is so weit – dann is Aschamittwoch! Und do beginnt dann bei uns in Bayern immer no für ganz schee vui Menschn die Fastnzeit. Weil laut da Bibl hot se scho da Jesus nach seina Daf zruckzogn in de Wüstn  – ganz ohne Brotzeit!!!

Jetzt muas ma ja scho amoi sogn, heidzudog hod des Fastn mit dem Glaubn äha weniga zum duan. Des is seid a boar Joahr einfach voi im Trend.  Und nur ums Essn gäht`s do a scho lang nimma. Die oana dringan koan Alkohol mea. N guad bei uns in Bayern is des natürle realativ zum seng. Denn des Bier zählt ja bei uns ned zum Alkohol sondern zu de Grundnahrungsmittel. 
Ganz guad kimmt natürle nach wie vor des mit de Süßigkeitn. „Na, a Sahnetortn gäht bei mia zur Zeit ja leider ned. Is hoid Fastnzeit. Woast schoo“, hear i dann wahrscheinlich wieda öfta, wenn ich moi jemand zum Kaffätringa in unsa Büro eilodn dua. Aba a druckana Kastnkuach deafs dann doch sei. Is ja a irgendwie a Verzicht – zumindest auf de Sahne.
Und dann gibt´s no dejenigen, die jetzt 40 Dog lang nimma feanseng woin. Jetzt amoi ehrlich. Is jetzt a ned unbgedingt a Verzicht, sondern äha a Bereicherung, oda?
Wos kann ma jetzt no ois fastn? Na ja, Smartphone weg. Heart ma a imma wieda. Klappt aba meistens a ned so guad. A Freundin vo uns hod dazu gmoant, sie ko des guad, weil sie dann einfach des Fastnprogramm schnella durchziagt. Statt 40 Dog dann eben nar oan Dog.
Guad – und dann hod uns gestern a Freind vo mia und de Damen vo Innpuls.me erzäid, dass se er jetzt schweren Herzens dazua entschlossn hod, 40 Dog lang koan Sport mea zu macha, sondan nur no faul auf da Couch rumhenga wui mit Chips und Süßigkeiten aufn Schoss. Sei dann ja schließle ja a guada Verzicht. Hod scho aa a gewisse Logik, muss i zuagehm.
I seibst wui heia auf den Verzicht verzichtn. Mei…San ma doch a moi ehrlich. Des verzichtn kenn ma ja jetzt nach zwoa Joar Corona äh olle guad. Do kannt dann äha da Verzicht vom Verzicht a Herausforderung wearn

Bis zum nächsten Moi
Eire 
Roslinde 

Wochenrückblick der Roselinde

Wochenrückblick der Roselinde

von | 20. Feb. 2022 | Heimat

Griaß Eich!

Mei, des war a Woch. Vo Unwetterwarnung zu Unwetterwarnung. Erst hod ma nur no vo da „Ylenia“ glesn. Glei drauf ist dann de „Zeynep“ kema und heid liest ma vo da „Antonia“. De soid a wieda Sturm, Regn und sogar Schnä bringa. Bin gspannt, wann dann amoi a Roselinde so richtig füa RambaZamba sorgt. 
„Zeynep“ ist übrigns a türkischa Fraunnama und bedeit „wohlriechade Wüstnpflanzn“ oda wahlweise „Schmuck des Voda (hochdeitsch Vater).
Jetzt frogts Eich sicherlich, wia des jetzt mit so am gfährlichn Sturmtief zampasst. I kon`s Eich sogn: Gar ned. Um des gehts a ned. 
De Nama warn vom Verein Berliner Wetterkarte und dem Institut für Meteorolgie der Freien Universität Berlin vergebn. Die ham se dazu  im Jahr 2002 die „Aktion Wetterpate“ ausdenkt.
Und jetzt kimmts. Jeda ko do Namensvorschläg macha!
Aba nix is hoid umsonst auf dera Weid. Wenns a Tief nach Eich benanna woids, miasts 240 Euro zoin.
A Hoch kost dann sogar 360 Euro. Da Grund ist jetzt ned, dass so a Hoch hoid einfach schenna is wia so a Tief, sondern weard mit da längern Lebensdauer und damit Sichtbarkeit auf da Wedakartn begründt.
130 Tiefdruckgebiet und 50 Hochdruckgebiet pro Joahr gibt`s bei uns zur Auswoi. 
Friaha ham bei uns die Teifdruckgebiet Frauennama ghabt und die Hochdruckgebiet Männernama. Aba damit is zum Glück seit de 70er Jahr vorbei. Jetzt weard brav obgwechselt. In die grodn Joahr san die Hochdruckgebiet männlich und de Tiefdruckgebiet weiblich und in ungrode Joahr is dan grod andersrum. 
I muas mi jetzt ned unbedingt auf soana Wetterkartn lesn und dann vielleicht ja no ois ganz bäsa Sturm in de Gschicht eigeh. Aber wen se oana vo Eich so verewign woi – bittschee. Kennt´s gern macha. Aba für 2022 san bereits olle Wetterpatenschaftn vergebn.  
Jetzt schau ma moi, wia se de Antonia mogn bei uns aufführt. I hof, se bleibt friedle. Sonst dua i mi wieda mit dem Fliagn so schwar. 

Wünsch Eich a scheene Woch

Eire Roselinde

Wochenrückblick der Roselinde

Wochenrückblick der Roselinde

von | 13. Feb. 2022 | Heimat, Pinnwand

Griaß Eich!

Do bin i scho wieda!
War a kurze Woch, find i, wei, bei uns war scho ganz schee vui los in da Stodt.
Da Kreisfischereiverein Rosnhoam hod an Aufnahmestopp gmeidt, oiso der ko jetzt vorerst koane neie Mitglieder mehr aufnehma, weil se in Corona-Zeitn so vui vo Eich Menschn fürs Angeln interessiert ham. War hoid in Zeitn der Lockdowns oans der wenign Hobbys, de ma no hod macha keena ohne mords Auflagn. 
Jetzt sans aba zwui Anlger woan….. Ned dass unsre Seän und Flüss no die Fisch ausgengan! Drum da Aufnahmestopp. Mei, gibt ja a no andere Hobbys oda? Weard Eich scho wos eifoan. 
Für den Woif, der in de vergangana Wochan für so vui Trube gsorgt hod, is de Geschicht leida ned guad ausganga. Er is überfahnr worn. Damit hod se des „Problem“ quasi vo alloa glöst  – bis zum nächstn Woif oda irgendoan andarn Wuidviech, des ned genau des duat, wos Eich Menschn in den Kram passt. 
Nix füar unguat..Kemm ma liaba zu an lustigan Thema:
Am bestn gfoin hat mia de Meldung mit der Schnaps-Verkostung im Landratsamt. Mei do war i a gern dabei gwesn. Aber ned das ia jetzt moants, des war a lustige Angelegenheit. Na, des war a bierernste Sach bei dene Edelbrandsommelieres.  Ganga is dene um Birnschnaps. Aus wechane oide Sortn se da beste Schnaps brenna lost, woidn de Schnaps-Expertn wissn. Da Landrat hod a a bisserl mitkosten dearfa. Ob de nocha no hoam gfundn ham, dad mi scho interessiern. Aber do woas i jetzt nix gwiss.
Bei Bierrnst foid mia no de Diskussion ei, die der Drognbeauftragte der Bundesregierung de Wocha ins Spui brocht hod: Biar erst für 18-jährige. Ja, wos soi i jetzt dazua sogn. A Bayer ist der Drognbeauftragte auf olle Fälle ned. Bei uns is des Biear koa Alkohol, sondan a Grundnahrungsmittel. Vielleicht erklärts eam a no oana oda da Söda gäht ja do wieda an Sonderweg. Kennt ma ja.
So und jetzt genehmige i mir no glei auf de Debatte hi an kloana Schluck Eierlikör und danoch drief i mein bestn Taubnspetzl Benni. Mia woin heid no a bisserl rumfliangn und Leid beobachtn in das Stodt – damit i dann am nächstn Sonndog a wieda wos zum erzäin hob.

Bis zum nächstn Moi
Eire Roselinde

Wochenrückblick der Roselinde

Wochenrückblick der Roselinde

von | 6. Feb. 2022 | Heimat, Pinnwand

Griaß Eich!

Wer vo Eich hengt grod scho wieda vorm Fernseha zwecks Olympia? Garantiert so einige. Is hoid schee, wenn ma se oschaun koo, wie andere so richtig Voigas gebn, schwitzn, frian und schnaufan, während ma seiba ganz gmiatle im Poistastui hengt mit wos zum dringa und vielleicht a no ana Tütn Chips auf de Knia. 
Denkts Eich nix,  i machs ja heid a ned anders. Dabei kannt i scho a mithoidn mid de Athletn. I konn nämle an oan Dog über 800 Kilometer weid fliagn und ko dabei bis zu 185 km/h schnei wearn. 
Guad, des hob i jetzt a googelt. Seiba war ma des nämle ganz schee zbläd. Wieso soid i denn so weit fliagn und dann a no so schnei? 
Na, do fuadat i lieaba gmiatle Kuacha-Bräsl. Wenn des amoi aa a olympische Disziplin weard, bin i dabei. Do schlogt mi nemle koana – weda in da Geschwindigkeit no in da Menge.
Jeatzt weards Ihr wieda denga, wos de Roselinde do wieda füar an Schmarn dazapt. Bei Olympia gibts natürle nur gscheide Sportartn….
Do deischts Eich aba. Jedes Jahr kemman a boar Diziplinen weg und dafür andere dazua. Siebn neie Sportarten stengan diesmoi in Peking auf dem Programm. Bei manche, wie etwa „Shorttrack“ kon i ma eigentlich ned vorstain, um wos do geh soi. Auf Deitsch hoast des ja nua „Kurze Streckn“, auf boarisch lost se des mit „gmiatlich“ übersetzn. Vielleicht gengans do a Rundn um eana Hotel oder so.
Aba ob se de Sportart dann lang hoid, i woas ja ned. San ja in da Vergangenheit a scho einige Sportartn wieda ganz schnei verschwund. Bei oana bin i persönle bsondas froh: 1900 is Taubnschieaßn aufn Programm gstandn. Gschossn hams auf lebendige Taubn. Insgesamt 300 ham dro glam miaßn. So a Frechheit. 
A nima zur Zeit passn dat meina Meinung nach des Tabak-Weitspuckn. Des hods 1904 in St. Louis in de USA gebn. Welche Athletn aus weichane Lända do jetzt bsondas weit spucka ham kena, is leida ned überliefert.
Im gleichn Jahr sans übrigens a no in Tonna gsprunga. Wos des häd bringa soin, wos i jetzt a ned. 
Sogar des Sackhüpfen war a moi a olympische Disziplin. Heid kennt ma des ja nur noo vo de Kindageburtsdog.
Oiso is scho möglich, dass se Keksbräsl-Essn  irgendwann ois Olympische Disziplin durchsetzn ko. Drum üb i jetzt glei a moi weida.

Bis zum nächstn Moi
Eire Roselinde