Innpuls.me

Wochenrückblick der Roselinde

von Karin Wunsam | 30. Jan. 2022 | Heimat

Griaß Eich!

Heid habt`s aba Massl, dass wos vo mia heards.
Wei bei dem Wind hob i mia beim Fliagn vom Max-Josefs-Blotz ausi zu de zwua Damen vo Innpuls.me ganz schee schwar do. Nix im Vergleich zu dera Sturmflut hoch om im Nordn, aba füa a so kloana Vogl wia mi dann doch ganz schee gach.
Fast häd`s ma mein neia Schoi weggwaht – und dann bin i am Schluss damit a no in da oidn Fichtn im Gartn der Zwoa henga blim.
De ham glacht! I hob `s aba gar ned so lustig gfundn. Hod dauert, bis i mi vo dera Notlage befrein hob keena. Und de ham ma dabei zugschaut und imma weida glacht. So sans. Aba jetzt bin i do und bevor i mia vo de zwoa Damen ois Entschädigung mindestens a ganze Hand voi Keksbräsl hoi, fass i natürle für Euch wieda kurz zam, welche Nachrichtn auf innpuls.me i in da vergangana Woch bsondas interessant gfundn hob.
Bsondas lustig hob i de Polizeimeldung von da versuchtn Entführung von dem Rindsvich in Hoizkirchn gfundn. Du woid woi oana a frische Mili für sein Kafä hom. Aba dann statt da Milibitschn glei de ganze Kua klaun woin, oiso des is scho a starks Stickl.
Dann war do a no de Sach mit dem Ponykarussei am Herbstfest. Trotz Protest weards des jetzt erst amoi weida bei uns am Herbstfest gem. Tierschütza findn des gar ned in Ordnung und i bin a dera Meinung, dass des ned braucha dad. Gibt doch a scheena Pferdekarussei ohne echte Pfeardl. Sama doch a moi erhlich, ihr mechats doch a ned stendig im Kreis rena und i mechat a ned ständig im Kreis fliangn.
Am End vo da Woch ist dann amoi wieda um de ewign Staus auf da Inntalautobahn ganga. Da Söda hod se jetzt amoi hikockt und an Briaf gschrieam – oiso woi äha einetippt in sein Computer. Er wui, dass da Bundesverkehrsminista endle a moi ause kimmt aus seine Pluschn und die Maut auf de Autbahna deiriga macht. Moi schaun, wos de Östareicha dozu sogn waern. Wearm ma sicha in Kürze erfahrn.
Des war`s jetzt füa heid vo meina Seidn aus – mia hearn uns dann am nächstn Sonndog wieda.
Bis dohi – passt`s auf Eich auf -lost`s Eich ned davo wahn

Eire Roselinde

Wochenrückblick der Roselinde

von Karin Wunsam | 23. Jan. 2022 | Heimat

Griaß Eich!

Oiso, de in dera Woch war bei uns auf innpuls.me tierisch ganz schee vui geboten. Da Woif hod fast tägle für a neie Schlagzeiln gsorgt. Die oana findn eam supa, de anderen äha weniga. Auf olle Fälle hod a jetzt zumindest amoi a Schonfrist bekema. Wenn da Woif des a glesn hod, wars woi bessa füa eam, dass a se jetzt schnei ausn Staub macht. Ned dass eam a no so gäd, wia dem Bruno-Bärn. Der stäht ja jetzt ausgstopft in so an Museum…
A scheenas Thema san do die Wally und de Bavaria – de zwoa Bartgeier-Weiber. De san ja vor etliche Monat in da Wuidness ausgssetzt woan, zwecks Wiedaansiedlung oda so.
Auf alle Fälle is de Bavaria vor zwoa Monat dann plötze vom Radar verschwundn. Und jetzt woas ma a warum. De Akkus vo ihram Solar-Peil-Senda ham den Dienst versagt. So vui zum Thema Solar-Energie. Haut hoid no ned imma so guad hi. Is aba da Bavaria vielleicht grod recht. Wer mächt se scho ständig beobachtn lossn? Do learnt de doch nia an Freund kenna, oda? Und ohne Freind schauts dann mit da Vermehrung ned guad aus, deng i.
Weida mit dem Ponykarussel bei uns aufm Rosenheimer Herbstfest. Mei, die Kinda hod des scho gfoin, aber de Pferdl garantiert weniga. Wer mächt scho ewig in da Rundn lafa. Des war ja so, ois miasat i ständig in da Rundn fliagn, do kriagt ma doch an Drehwurm und des muas wirkle ned sei.
Und jetzt zum letztn tierischn Aufrega da Wochn bei uns auf innpuls.me. Und do bin i ma jetzt sicha, dass ihr de Ungerechtigkeit schlechthi gar ned mitkriagt habts. Es gäht um des Foto vo dera Möwn, wie sie am scheena Chiemsee im Flug a kloans Brotstückal aus da Luft fangt. Mei, hod de wieda vui Likes kriagt!!! Weis ja so schee ausschaut und so guad fliagn kon und übahaupt a so scheena Vogl is.
I konns nima lesn. I hob heid beim Kaffetrinka mit de zowa Damen von innpuls.me a die letzten Keksbräsel von eanane Teller aufgfuadat. Do hod koana a Foto gmacht. Ganz im Gegenteil, schief ogschaut hams me und gmoant, ob i jetzt eigentlich die diesjährige Fastnzeit zum Abspeckn hernema wui.
Es is einfach ungerecht. Aber wos sois. Auf den Ärga heid genehmige i mia jetzt no a kloane Nachspeis.

Bis boid
Eure Roselinde

Wochenrückblick der Roselinde

von Karin Wunsam | 16. Jan. 2022 | Heimat

Griaß Eich!

Heid hob i gar ned so vui Zeit für Eich. Wei heid feian mia den 18. Geburtsdog von da Sefa, oiso die Josefa vo innpuls.me.Natürle bin i do a einglon. Hob me a scho extra schee gmacht mit dera Kettn do mit de Flügal, schoo schee, oda!?
Übrigens dearfts mir dann moang gratulieren, wei do hob i Namensdog und eigentle ist dea ja bei uns im scheena bayernland meara wert wie so a Geburtsdog. War zumindest fruiaha a moi so.
Wenn des imma no guidn dad, dann dadat vielleicht a i moang an Brief vom boarischen Ministerpräsdenten höchstpersönle kriagn – so wie heid de Sefa. Wenn ma den jetzt a wieda mit fruiaha vergleicht, dann kannt ma sogn a Schreibn vom Kini.
Am bestn hod mia in dem Schreibn der Satz gfoin, dass de Sefa und damit natürle a i in an großartigen Land lebn.
Guad, des hed a jetzt a ned schreim miasn. Des wiss ma ja äh.
Zumindest großartig, solang ma ned a Bär oder Woif is. Für de wars bessa, wenns Bayern weitleifig meidn dadn. Aba des is a anders Thema und koa rechts scheens. Darum mach i an dera Stäi für heid a schoo Schluss und verabschied mi bis demnächst.

Eiare Roselinde

Wochenrückblick der Roselinde

von Karin Wunsam | 9. Jan. 2022 | Heimat, Pinnwand

Griaß Eich!
I war groad a Rundn Schlittschuah-Fahrn auf da Wassaschoin auf da Terrassn vo da Sefa und da Karin. Schee war`s. Wenn a ganz schee frisch und windig. Aba mia ois Stodtdaubn ko des ja nix ohham. Frian du i so leicht ja ned. Nurs fliagn is heid a bisserl schwaar. Aber dann bleib i hoid heid bei dene zwoa dahoam. Do gibt`s imma woas guads fua mia zum fuadarn und außerdem erfahr i do a imma Neiigkeiten aus da Stood.
Aber jetzt`d zu Eich.

Wissts Ihr, wann se da Nikolo und da Ostahos dreffan?
Ned!?
I sogs Eich. Genau jetztd – nämle in de Supermärkt. Glei neba de übrigbliema Schokonikoleis schdengan seid dera Wocha die Schoko-Ostahosn. Do homs jetz amoi de Gelegnheit, se üba ihr Geschäft auszutauschn.
Da Nikolo konn am Ostahosn erklärn, wos da Vorteil von an großn Jutesog gegenüba von so kloane Nestal ist. In so an Sog kon ma doch vui meara transportiern. Und da Ostahos kon dem Nikolo guade Tipps gem, wie ma des Schenga attraktiva macht. Einfach verstecka und scho weard die Freid no gräsa.
Wea woass, vielleicht schaun dann Weihnachdn und Ostan boid a bissal anders aus.
Konn ja ned imma ois gleich bleim, oda?

Do ken ma dann zum zwoatn Thema in dera Wocha – da Woif. Der is jetzt a im Chiemgau daoam. Des hams duach an Test rausgfundn. Und an gsundn Hunga hod a aa. Rehschlegl, Lammbron und no so einiges andas hod a se scho schmecka lossn. Dass des de Besitza vo dena Viachal ned gfoid, is klar. Drum gähts jetzad jetzt rund im Chiemgau. Wias do weitergeht, woas man no ned. Wünsch dem Woif aba natürle nur des Beste – a wenn ich froh bin, dass a se woi bei uns in da Stod ned weard blicka lossn. Wei i glab, an Taubnbron dad der a ned verschmähn, glei gor nach de Feierdog. Hob scho a a bisserl zuglegt, muss i zuagem.

Leida gibt`s aba seibst in da Stod jemand, der uns Taubn des Lebn immer a bisserl schwaar macht. Da Turmfoik. Der eingbuidete Kerl macht seit a boar Joahr im Frühling Familienurlaub in a luxeriösen Eigentumswohnung im Turm vo da Nikolaus-Kirch. In etliche Monat is wieda soweit und dann suchan mia Taubn liabe des Weite. So a grantiga Kerl, sei Weib mid ihrane sportlichn Modlfigur is a ned bessa und erst de verzonga Kinda! Na, i sogs Eich.
Und wia dea bei uns hoffiart wearn. Da Foikner staffiert vorm Eindrefa dera ehrenwärtn Familie immer de Luxus-Ferienwohnung gmiatlich aus und dann stäit er a Kamera auf, damit de ganze Wäid seng kon, wos de Foikn den ganzn Dog so dreim – oiso quasi a tierisches Big-Brother.
Des brauchad i jetzt ned. Mia dauernd zuschaun lossn, bei ois, wos i so dua. Na, do bin i liaba a einfache Stodttaubn.

Bis zum nächstn Moi
Eire Roselinde

Roselinde geht auf die Reise

von Karin Wunsam | 21. Dez. 2021 | Aktuelles

Rosenheim – Wir freuen uns sehr, dass unser 1. Adventskalender auf Innpuls.me bei Euch so gut ankommt. Tatsächlich gingen auch für unser Gewinnspiel viele Einsendungen ein. Danke für Euere Teilnahme. Wir und natürlich auch unser Maskottchen Roselinde freuen usn sehr. Die beiden Gewinne – eine Plüsch-Roselinde und ein Büchlein vom Luci-Bär – treten jetzt gerade ihre Reise zu den Gewinnern an.

Josefa hat die Gewinne eingepackt und losgeschickt.

Innpuls-Maskottchen: Roselinde

von Karin Wunsam | 18. Nov. 2021 | Heimat, Pinnwand

Rosenheim – Darf ich vorstellen: Das ist „Roselinde“ – Maskottchen unserer Online-Plattform Innpuls.me. Die Taubendame bekommt auf ihren Rundflügen und Runden über und durch die Stadt ganz schön viel mit. Ihre Erlebnisse und Gedanken teilt sie regelmäßig mit Euch – natürlich auf boarisch.

Griaß God!

I bin de Roselinde.
Mei Revia is Rosenhoam. Des is de Stod mid da Rosn im Wappn. „Rose“ fia olle Houchdeitschn und Zuagreisdn. Ihr vastäd `s scho. Daher aa mei Nama „Roselinde“.
Scho schee, oda?

Bsondas gearn hoid i mi im Rieda- und Salingardn und aufn Ludwigsplotz auf. Nur am Max-Josefs-Plotz mog i seit a poar Joar nimma so gern sei. Den Grund verrod i Eich amoi anders. In letzta Zeit war i a oft vorm Rathaus unterwegs. Warum? Ja, wei do is oiwai wos los. Wos ma do ois aus da Menschnwäid mitkriagt.
I sogs Eich!
Kürzlich hams so a Kommissar und a boar Polizistn ganz wichtig ghabt vor unsam Rodhaus. `s hod wieda oamoi oan Mord ggem. So vui wia bei uns gmordet werd, miassad Rosenhoam eigentle scho ausgstorbn sei.
Zum Massl passiern de Morde aba grod in da Phantasie vo vui Schriftstäiern und natürle a vo de Drahbuchautorn da Rosenheim Cops. De kennt`s ihr doch olle, oder?!
Des san die, die unsa Stoad so richtig berühmt gmacht ham. Seit de im Fernsehn lafan, ströma jedn Dog de Touris eina, weils unbedingt seng woidn, wo de Rosenheim Cops arbadn und eamiddln. Und wia de dann immer schaun, wenn`s mitkriagn, dass des Polizeirevia eigentle unsa Rodhaus is. Schoo lustig!
Um Mord und Totschlog gäd`s do im echtn Lebn zum Glück ned. Aba houch her konns Do scho a amoi geh. Aba des eazäi i Eich a anders moi.
Jetzt aba east amoi zrugg zu mia.
Zur Zeit is bei mia in da Stoad wieda ganz schnee vui los. Wie jeds Joar vor Weihnachtn. Do kaffan de Leid quasi ganz Rosnhoam laar. Wia do manche aufpacklt san. I staun do imma wieda.
Jetzad hams ja amoi in de Medien scho gmaidt, dass so einiges scho ausakaft is. Schee blöd. Wos soin de Menschn denn dann an Weihnachtn doa, wenns nix mehr zum Packln hoam?
Aba da Beppi, mei bester Taubn-Spezi hoad gmoant, des kannt a amoi ganz guad sei. Weil vui Leid äh scho so vui Grafe und Glump dahoam ham.
Do hod a natürle recht. Wos bringt jetzt no amoi a Krawattn mera oda a Hoiskettn?
Und des lustige is ja, das vui vo de Geschenka noch Weihnachtn dann wieda an mia vorbei drong weard, do hi, wos ursprünge hearkemma san. Wei anscheinend ganz vui Gschenka bei den Beschenkten ned so guad okemman, wie da Schenka moant.
Wear woas, wenns dann heia weniga zum Packln gibt, vielleicht singan und lachan die Menschn dann wieda mehra. Mir dats gfoin und den Beppi a.
Für den ho i mir übrigens a scho a Geschenk ausdengt. Hod nix kost. I ward mit dem Benni an Weihnachtn auf den Kirchturm vo St. Nikolaus aufefliang. Aktuell san die grantigen Turmfoikn ja wieda an eanan andern Wonsitz.
Und vom Kirchturm aus schaun ma dann üba de Stod auf die Liachta und san de Engal ganz nah.
Und wer woas. Vielleicht bsuacht uns ja a amoi des Christkind.

Bis boid – de Roselinde aus Rosnhoam