Neues von der Roselinde

Neues von der Roselinde

von | 24. Juli 2022 | Heimat, Pinnwand

Griaß Eich!

Habt`s ihr zua Zeid aa so oan Stress wia i? Oiso koan beruflichn Stress, sondern Freizeidstress. 
Bei mir is des auf alle Fälle da Foi und bai vui andre, de i kenn, a. 
I sog Eich oans. So ko des jetzt schee langsam nimma weida geh. Jeden Dog gfuit 100 scheene Veranstaltunga in Rosnhoam und Umgebung, wo i gern dabei waarad. Letze Woch war do beispuisweis des Sommerfestl bei uns direkt in Rosnhoam mit ganz vui bekannte Stars. Fast jeden Dog hätt ma do auf Nocht sei kenna und dann san do no ganz vui andere Festl, Theater und Musikveranstunga gleichzeitig gwesn. 
So vui wia heia war no nia los bei uns. Liegt sicha a aa weng an dera blädn Corona-Pandemie. Weil, zu dem wos heia äh waarad, kimmd jetzt ois des dazua, wos letzts Joahr und vorletzt Johar gwesn war, aba ned sei hod dearfa und darum jetzt nochghoid weard. 
Und damit kon i ètz so manche Freind, de i in de vagangane zwoa Joar weng Corona ned dreffa hob kenna, wieda ned seng. 
Des schaut dann nämlich zur Zeit imma so aus: Do frog i beischbuisweis de Resi, host nächste Woch a moi Zeit für mi und dann schlogt de Resi east oamoi iranTerminkalenda auf und fangt zum bladln o. Sie bladlt ganz schee lang und dann sog`t sie zu mia: „Mei, wia schauat`s denn bei dia so im Oktober aus am Zwölftn. Do kannt i de no einepacke zwischen Zwölfe und Oans zu am schnelln Kaffä.
Und dann fang i zum Bladdln in mein Terminkalenda o und dann sog i zu  da Resi: „Du, da kann`s bei mia a weng eng warn. Und im Dezemba is a scho recht zua. Aba dann im nächstn Joahr nach Silvester und mein Skiurlaub schaut`s momentan no ganz guad aus. Soin ma uns des amoi vorsichtig notiern?
Na, so geht des jetzt nimma weida. I mach jetzt Urlaub vom Freizeitstress und dua a moi gar nix mear. Nur für meine bestn Freind, wia mein Taubnspetzi Beni und natürle a de zwoa Damen vo Innpuls.me hob i natürle imma Zeit. Aba des war`s dann a scho. Basta! Servus!

Wünsch Eich wos
Bis zum nächsten Moi

Eire Roselinde

Wochenrückblick der Roselinde

Wochenrückblick der Roselinde

von | 1. Mai 2022 | Heimat, Pinnwand

Griaß Eich!

Habt Ihr heid aa so an Stress? 
Bei uns in Bayern is heid so vui los wia scho ganz lang ned mehr .
Wei an dem heitign 1. Mai woins jetzt olle ois nochhoin, wos hoid in de vagangane zowa Joahr ned mehr ganga is, wega dem Corona. 
Mit dem 1. Mai is aber sowieso so a Sach. Für mi hod der Dog ja a Persönlichkeitsstörung. Auf da oana Seitn weard do laud protestiert und gschimpft und auf da anderen Seitn lustig gfeiert. Scho a weng seltsam, oda!
Bei de streitbaren Gwerkschafter war i heid scho zum Bsuach. Guad vom Protest hob i jetzt do ned so vui mitgkriegt. Ich konn Eich egentle nur erzain, dass des frische Popcorn bei dene, des eigente füar de kloana Gäst bedacht war, guad gschmeckt hod, mia und meiner Kollegin Josefa vo Innpuls.me
Danoch is für uns natürle no weidaganga zum antiken Trödelmarkt. Do war die Stimmung jetzt a ned ganz so ausglassn, weil hoid des Weda heid ned ganz so guad mitspuit. Späta woin mia vielleicht no a bisserl zum Maifest in da Vetternwirtschaft geh. Moi schaun.
Insgesamt is des Angebot bei uns in da Stodt aba am heitign Dog dann doch noch eha überschaubar. 
Anders schauts do bei uns auf`m Land aus. Do wern heid so vui Maibäum aufgstäit, dass ma scho fast den Übablick darüber valiad, wer wann wo.
Bsondas eifrig war heia übrigens a Gruppe Holledauer. Die ham ganze sechs verschiedene Maibäum zusammenklaut. Und wos ma so gheard hod, hams dann mit dem Bewacha vo eanana Rekord-Beute ganz schee vui zum doan ghabt. I mecht ma jetzt gar ned vorstäin, wos de heid olle für an Rausch hoam bringan, wenn`s dann glei 6 Moi auf an neia Maibaum ham ostoßn miassn.
Des war mia dann doch zvui. Do loß i den Maifeierdog dann doch liaba a bisserl ruhiga ogeh. Gibt ja no andere Bräuch, de mit dem 1. Mai zamhengan und a schee san.
A ganz a scheena Brauch is aba leida im späten 20. Jahrhundert wieda verlorn ganga – da Maikorb. Den hod ma früha mit Siassigkeiten und Bluma gfuit und seine Nachbarn unerkannt vor de Tür gstäit. 
I find des kannt ma doch wieda einführn. Wos moants Ihr? 

Bis zum nächstn Moi
Eire Roselinde

Wochenrückblick der Roselinde

Wochenrückblick der Roselinde

von | 27. März 2022 | Heimat, Pinnwand

Griaß Eich!

So – und wie schaut`s jetzt bei Eich aus? Habt`s scho an olle Uahn bei Eich im Haus draht? Des is a Arbat. Wanduan, Armanduahn und dann no die Uahn im Auto, am Ofa und und und. Bis ma do fertig ist, ist da Sonndog a scho fast wieda vorbei. 
So a Blädsinn des Ganze, oda? Dat doch a ganz guad ohne des Prozedere geh. Füa mi lebt`s se mit da Wintazeit im Somma a ganz guad. 
Da Beni, mei  bestaTaubn-Spetzi, woid heid vo mia wissen, wos jetzt egentle de richtige –  oiso de echte Zeit  – is. Sommazeit oder Wintazeit? 
Do hob i dann a erst amoi a weng guggln miasn.
Oiso, die Wintazeit ist demnoch die echte Zeit – wei de orientiert se am Sonnenstand. 
Aba jetzt amoi ehrlich – i ois Stodttaubn find ja, dass ihr Menschn des mit da Zeit äh vui zeng segts. Punkt 6.20 Uhr aufsteh, dann um Achte im Büro sei, garbat wird dann bis um 17 Uhr und dann muas ma se sputn, dass ma punktle um 18 Uhr essn ko, damit ma dann um 18.45 Uhr  no schnei zum Training. So wos vo anstrengend.
Dabei hams Eire Vorfahrn lang vui gmiatlicher ogeh lossn – zumindest so lang, wias no koane Uarn gem hod. War übrigens ab dem 14. Jahrhundert da Foi . Davor ham se de Leid grob am Stand vo da Sonna orientiert und se beispielsweis zum Hahnaschrei am Morgn verabredet. Hod a highaut. 
Aba heid geht des natürle nimma. Do wui koana mehr a nua oa Minutn auf irgendwos wartn. Und damit ma ja nix versama ko, hod ma se dann irgendwann überlegt, ob ma ned die Zeit so beeinflussn ko, dass ma no mehr Zeit in oan Dog einepacka ko. 
Da Gründervata der USA, da Benjamin Franklin, beispielsweis, hod scho 1784 darüber nochdenkt, ob ma ned olle Menschen genau beim Sonnenaufgang wecka soad. Wei dann kannt ma doch bessa des Sonnalicht ausnutzn und mehra Arbat schaffa.
Ois schee und guad. Aba oans sog i Eich. Egal, wos ia a machts. Mehr Zeit gwinnts ihr so oda so ned.Do kennts ihr macha wos ihr woids.
Darum mei Rat an Eich. Geht`s es liaba moi a weng ruhiga o. Losst olle viere grod sei und schauts a moi an ganzn Dog ned auf die Uhr, sondern hearts auf Eire innere Uah. Des hod a Bekannter von uns amoi sogar an ganzn Monat lang ausghoitn. Nachher war der tiefenentspannt und versamt hod a a nix – hod a uns zumindest gsogt. 

Bis zum nächsten Moi
Eire Roselinde

Wochenrückblick der Roselinde

Wochenrückblick der Roselinde

von | 27. Feb. 2022 | Heimat

Griaß Eich!

Moagn ist Mondog, dann kimmt da Dienstag und dann is so weit – dann is Aschamittwoch! Und do beginnt dann bei uns in Bayern immer no für ganz schee vui Menschn die Fastnzeit. Weil laut da Bibl hot se scho da Jesus nach seina Daf zruckzogn in de Wüstn  – ganz ohne Brotzeit!!!

Jetzt muas ma ja scho amoi sogn, heidzudog hod des Fastn mit dem Glaubn äha weniga zum duan. Des is seid a boar Joahr einfach voi im Trend.  Und nur ums Essn gäht`s do a scho lang nimma. Die oana dringan koan Alkohol mea. N guad bei uns in Bayern is des natürle realativ zum seng. Denn des Bier zählt ja bei uns ned zum Alkohol sondern zu de Grundnahrungsmittel. 
Ganz guad kimmt natürle nach wie vor des mit de Süßigkeitn. „Na, a Sahnetortn gäht bei mia zur Zeit ja leider ned. Is hoid Fastnzeit. Woast schoo“, hear i dann wahrscheinlich wieda öfta, wenn ich moi jemand zum Kaffätringa in unsa Büro eilodn dua. Aba a druckana Kastnkuach deafs dann doch sei. Is ja a irgendwie a Verzicht – zumindest auf de Sahne.
Und dann gibt´s no dejenigen, die jetzt 40 Dog lang nimma feanseng woin. Jetzt amoi ehrlich. Is jetzt a ned unbgedingt a Verzicht, sondern äha a Bereicherung, oda?
Wos kann ma jetzt no ois fastn? Na ja, Smartphone weg. Heart ma a imma wieda. Klappt aba meistens a ned so guad. A Freundin vo uns hod dazu gmoant, sie ko des guad, weil sie dann einfach des Fastnprogramm schnella durchziagt. Statt 40 Dog dann eben nar oan Dog.
Guad – und dann hod uns gestern a Freind vo mia und de Damen vo Innpuls.me erzäid, dass se er jetzt schweren Herzens dazua entschlossn hod, 40 Dog lang koan Sport mea zu macha, sondan nur no faul auf da Couch rumhenga wui mit Chips und Süßigkeiten aufn Schoss. Sei dann ja schließle ja a guada Verzicht. Hod scho aa a gewisse Logik, muss i zuagehm.
I seibst wui heia auf den Verzicht verzichtn. Mei…San ma doch a moi ehrlich. Des verzichtn kenn ma ja jetzt nach zwoa Joar Corona äh olle guad. Do kannt dann äha da Verzicht vom Verzicht a Herausforderung wearn

Bis zum nächsten Moi
Eire 
Roslinde 

Wochenrückblick der Roselinde

Wochenrückblick der Roselinde

von | 13. Feb. 2022 | Heimat, Pinnwand

Griaß Eich!

Do bin i scho wieda!
War a kurze Woch, find i, wei, bei uns war scho ganz schee vui los in da Stodt.
Da Kreisfischereiverein Rosnhoam hod an Aufnahmestopp gmeidt, oiso der ko jetzt vorerst koane neie Mitglieder mehr aufnehma, weil se in Corona-Zeitn so vui vo Eich Menschn fürs Angeln interessiert ham. War hoid in Zeitn der Lockdowns oans der wenign Hobbys, de ma no hod macha keena ohne mords Auflagn. 
Jetzt sans aba zwui Anlger woan….. Ned dass unsre Seän und Flüss no die Fisch ausgengan! Drum da Aufnahmestopp. Mei, gibt ja a no andere Hobbys oda? Weard Eich scho wos eifoan. 
Für den Woif, der in de vergangana Wochan für so vui Trube gsorgt hod, is de Geschicht leida ned guad ausganga. Er is überfahnr worn. Damit hod se des „Problem“ quasi vo alloa glöst  – bis zum nächstn Woif oda irgendoan andarn Wuidviech, des ned genau des duat, wos Eich Menschn in den Kram passt. 
Nix füar unguat..Kemm ma liaba zu an lustigan Thema:
Am bestn gfoin hat mia de Meldung mit der Schnaps-Verkostung im Landratsamt. Mei do war i a gern dabei gwesn. Aber ned das ia jetzt moants, des war a lustige Angelegenheit. Na, des war a bierernste Sach bei dene Edelbrandsommelieres.  Ganga is dene um Birnschnaps. Aus wechane oide Sortn se da beste Schnaps brenna lost, woidn de Schnaps-Expertn wissn. Da Landrat hod a a bisserl mitkosten dearfa. Ob de nocha no hoam gfundn ham, dad mi scho interessiern. Aber do woas i jetzt nix gwiss.
Bei Bierrnst foid mia no de Diskussion ei, die der Drognbeauftragte der Bundesregierung de Wocha ins Spui brocht hod: Biar erst für 18-jährige. Ja, wos soi i jetzt dazua sogn. A Bayer ist der Drognbeauftragte auf olle Fälle ned. Bei uns is des Biear koa Alkohol, sondan a Grundnahrungsmittel. Vielleicht erklärts eam a no oana oda da Söda gäht ja do wieda an Sonderweg. Kennt ma ja.
So und jetzt genehmige i mir no glei auf de Debatte hi an kloana Schluck Eierlikör und danoch drief i mein bestn Taubnspetzl Benni. Mia woin heid no a bisserl rumfliangn und Leid beobachtn in das Stodt – damit i dann am nächstn Sonndog a wieda wos zum erzäin hob.

Bis zum nächstn Moi
Eire Roselinde

Wochenrückblick der Roselinde

Wochenrückblick der Roselinde

von | 9. Jan. 2022 | Heimat, Pinnwand

Griaß Eich!
I war groad a Rundn Schlittschuah-Fahrn auf da Wassaschoin auf da Terrassn vo da Sefa und da Karin. Schee war`s. Wenn a ganz schee frisch und windig. Aba mia ois Stodtdaubn ko des ja nix ohham. Frian du i so leicht ja ned. Nurs fliagn is heid a bisserl schwaar. Aber dann bleib i hoid heid bei dene zwoa dahoam. Do gibt`s imma woas guads fua mia zum fuadarn und außerdem erfahr i do a imma Neiigkeiten aus da Stood.
Aber jetzt`d zu Eich.

Wissts Ihr, wann se da Nikolo und da Ostahos dreffan?
Ned!?
I sogs Eich. Genau jetztd – nämle in de Supermärkt. Glei neba de übrigbliema Schokonikoleis schdengan seid dera Wocha die Schoko-Ostahosn. Do homs jetz amoi de Gelegnheit, se üba ihr Geschäft auszutauschn.
Da Nikolo konn am Ostahosn erklärn, wos da Vorteil von an großn Jutesog gegenüba von so kloane Nestal ist. In so an Sog kon ma doch vui meara transportiern. Und da Ostahos kon dem Nikolo guade Tipps gem, wie ma des Schenga attraktiva macht. Einfach verstecka und scho weard die Freid no gräsa.
Wea woass, vielleicht schaun dann Weihnachdn und Ostan boid a bissal anders aus.
Konn ja ned imma ois gleich bleim, oda?

Do ken ma dann zum zwoatn Thema in dera Wocha – da Woif. Der is jetzt a im Chiemgau daoam. Des hams duach an Test rausgfundn. Und an gsundn Hunga hod a aa. Rehschlegl, Lammbron und no so einiges andas hod a se scho schmecka lossn. Dass des de Besitza vo dena Viachal ned gfoid, is klar. Drum gähts jetzad jetzt rund im Chiemgau. Wias do weitergeht, woas man no ned. Wünsch dem Woif aba natürle nur des Beste – a wenn ich froh bin, dass a se woi bei uns in da Stod ned weard blicka lossn. Wei i glab, an Taubnbron dad der a ned verschmähn, glei gor nach de Feierdog. Hob scho a a bisserl zuglegt, muss i zuagem.

Leida gibt`s aba seibst in da Stod jemand, der uns Taubn des Lebn immer a bisserl schwaar macht. Da Turmfoik. Der eingbuidete Kerl macht seit a boar Joahr im Frühling Familienurlaub in a luxeriösen Eigentumswohnung im Turm vo da Nikolaus-Kirch. In etliche Monat is wieda soweit und dann suchan mia Taubn liabe des Weite. So a grantiga Kerl, sei Weib  mid ihrane sportlichn Modlfigur is a ned bessa und erst de verzonga Kinda! Na, i sogs Eich.
Und wia dea bei uns hoffiart wearn. Da Foikner staffiert vorm Eindrefa dera ehrenwärtn Familie immer de Luxus-Ferienwohnung gmiatlich aus und dann stäit er a Kamera auf, damit de ganze Wäid seng kon, wos de Foikn den ganzn Dog so dreim – oiso quasi a tierisches Big-Brother.
Des brauchad i jetzt ned. Mia dauernd zuschaun lossn, bei ois, wos i so dua. Na, do bin i liaba a einfache Stodttaubn.

Bis zum nächstn Moi
Eire Roselinde