Innpuls.me

Neues von der Roselinde: „Ostan is a scheens Fest“

von Karin Wunsam | 21. Apr. 2025 | Heimat, Pinnwand

Griaß Eich liabe Leid!

I woas ja ned, wias Eich heid so gähd. I platz auf olle Fälle aus olle Nähte. Bei uns hod es am Ostersonntag nämlich wieda den Ostabrunch gem – und der hod se bis in den spätn Omd eini zogn. Ostazopf, Ostaroar, Gelberuamkuacha, Ostaplatzal, Eierlikörkuacha und. und. und. So wos vo guad. Aba a ganz schee vui.

Um nächstens a bissal a Bewegung eini zum bringa, hama dan Oargschiebn. Des Bucka und Pfenning drauf leng is uns aba, gar nimma so leicht gfuin, so voigfressn wia ma olle warn.
Aba schee wars wieda, des Zusammensei. Eigentle gäd`s jo aa um des vui mehra ois ums Essn, Do gfrei i mi scho wieda auf des naxte Joar.
Und jetzt heb i erst a moi ob und drah a boar Rundn üba Rosnhoam, um Blotz zua macha fia de Reste vom Ostasonndog.

Bis zum nächstn Moi
Eire Roselinde

Neues von der Roselinde: Denkts ans Uhr drahn

von Josefa Staudhammer | 28. März 2025 | Heimat, Pinnwand

Griaß Eich! 

Es is moi wida soweit und da Wettlauf gega de Uhr geht los! Da alljährliche Höhepunkt vom menschlichn Wahnsinn, die Zeitumstellung, steht vor da Dia. De Umstellung vo da Winterzeit aufd Summazeit am 29. März. Vergessts ned an da Uhr zum drahn.

Die einen gfrein sich auf a Stund mehra Tageslicht, während de andern beschäftigt han, eana Uhr zum suacha und dann festzustellen, dass sie jeds Jahr aufs Neie vergessen, wie des genau funktioniert. Jeds Jahr da gleiche Spaß. Ich ko’s kam dawarten. Und dann hama no de de de Umstellung oafach komplett vergessn.
Do bin i froh, dass i a Taube bin und mit so ane Probleme nix zum do hab, außer eich Menschn zuazumschauen, wiaz eich es hetzt, um irgendwia no pünktlich in den Abat oder zu am Termin zu kema.
Lang hob i ja gar ned gwusst, was so a Zeitumstellung eigentlich is. Bis i moi drauf kema bin, dass ma de Uhren einfach noch voran oder hinten dreht. Auf so a Idee muss ma erst kema.
Also, wia Vögel ham gar koa Zeit, uns über Zeit so vui Gedanken zu macha..
Aber hey, wennst a Taube bist, dann is alles oafach. Du drehst einfach de Runde, setzt di auf’d höchsten Häuserdach und schaust den Menschen zu, wie sie sich den Kopf zerbrechen, weil ihre Uhr um eine Stunde verschoben is.

Bis zum nächsten Mal
Eire Roselinde

Neues von der Roselinde: Tierisches Sommerloch

von Karin Wunsam | 30. Juli 2023 | Heimat, Pinnwand

Griaß Eich liabe Leid,

`s is wieda do – des brühmt berüchtigte Sommaloch – und bsondas gearn tummeln se in dem Loch ollahand viecha.
Jüngst war des a vermeintle entlaffane Löwin irgendwo drom in Berlin.
Tagelang ham do de Schreibaling wos zum doa ghabt. Erst recht, wia dann aus da Löwin a Wildau woarn is.

Soichane Geschicht`n keman jetzt im Suma grod recht – denn do is ansonstn nämle ned so vui los. De Politika san jetzt fast olle im Urlaub und do schaut`s mit de Aufregga-Themen ehe an weng mau aus.
Und wias hoid imma so is, wenn Eich Menschn nix mehr eifoid, dann miassn mia Viecha herhoidn.
Do reiht se dea Wildsau-Löwin in a lange Reih ei. Viecha, de in da Vagangnheit des Sommaloch aufgfuit ham, gibt`s grod gnua.

Dea Sommaloch-Klassiker schlechthi war do da Brillenkaiman Sammy im Joar 1994, der in an Sä in Düsseldorf fünf Dog lang rumpaddelt is. I erinna mi a no an die Schnappschildkörtn Lotti im Joar 2013. De hod an Buam suaba bissn. Gfundn woarn is aber nia.

Dann hods a no des Kängeruh Skippy gem und die Kua Yvonne, außerdem a no a Kobra, de ganz groß rauskemm is in de Medien.
Seibst bei uns in Rosenhoam hods vor a paar Dog in da örtlichn Tageszeitung a Meldung gebn vo an Bearn, der vielleicht doch a eha a Wildsau sei kannt. Wos gwiss woas ma no ned. Des gibt sicherle in die kommende Dog no den oan oda andan Aufmacha.

Bin gspannt, wos für Viecha dann in de nextn Joar des Sommaloch fülln dearfn.
Vielelicht kim ja a i amoi no ganz groß raus – wenn`s mi beim Sitzn auf`n Kirchturm vo St. Nikolaus fia oan notglandn, zu gloa gratenen amerikanischn Seeadla hoidn.
Des probiae i ètz glei amoi aus.

Bis zum naxtgn Moi
Eire Roselinde

Neues von der Roselinde: Impfung gegen Hitze!?

von Karin Wunsam | 14. Juli 2023 | Heimat, Pinnwand

Griaß Eich liabe Leid!

Heid is `s scho wieda ganz schee warm. Aba so richtig hoass soi`s dann moang am Samsdog wern. 36 Grod im Schatdn! Jo, do draht ma doch duach und greift buchstäblich noch jedem Strohhoim.

Und des wissn woi aa de, de uns heid a Presseinformation gschick hom, mid foigenda Übaschrift: „Impfstoff gegen Hitze“.
East hom mia dachd, mia ham uns do valesn – ogsichts hoha Temperaturn und den oan oda andern kühln Cocktail wär des guad möglich gwesn – aba na!
Mia ham richtig glesn: „Impfstoff gegen Hitze“!!!

Do steign oam doch glei interessante Buidl in den Kopf, wia so a Impfstoff dann woi wirkt…
Werd ma damit zum Eiswürfl und kühlt si seibsd auf angenehme 20 Gradl oba? Oda weard ma zum Supaheldn, dea mid seim Atem ois um si herum eigfriarn ko?
Vuielleicht is dea Impfstoff gega de Hitzn aba gar ned fia uns Menschn dachd, sondan glei fia unsan ganzn Planedn? Des muas ab dann scho a ganz schee große Spritzn sei, mit dera ma dann die Erdn impft.
Mei, wos wundert oan heid scho no?

Aba, wenn jetzt vo Eich glei amoi oa ofangn zua goggln, wo ma den Wunderimpfstoff jetzt hearkriagt- spart`s Eich die Energie. Do kemmtt`s ihr nua sinnlos ins Schwitzn.
Nochdem mia de Meldung dann gnau studiad ham, wussdn mia, `s geht eigentle grod um Kühlwesdn.
Wia jetzt do da Schreibaling draufkema ist, dass a Westn a Impfstoff ist – des ist wieda a andere Frog.
Aba so vui steht jetzt fest: Oiso do bleib i dann doch lieba bei mein Cocktail und dem Strohhoim.

Prost- Bis zum naxtn Moi
Eire Roselinde

Neues von der Roselinde

von Karin Wunsam | 19. Feb. 2023 | Heimat, Pinnwand

Griaß Eich liabe Leid!

Mit dem Endspuart vom Fasching staid se für vui vo uns natürle wieda die Frog, wos ziang ma jetzt do o, wenn ma zu de Faschingsumzüg ziang oda a zu dem grossn Endspuart aufn Max-Josefs-Plotz in Rosnhoam am Faschingsdienstog?

I hob mi jettz do a moi an weng für Eich eigarbat ins Thema und gegooglt. So vui mo glei vornweg: es gibt jetzt heia nix, wos ned scho amoi gebn hätt. Do warn zum Beispui die guadn 1980er-Joahr. De san heua beim Fasching total ogsogt. Mit a bissal Glück findn do de etwas Reiferen unta uns a no ebas in da Klamottn-Kistn, etwa so an farblich dezentn Drainingsanzug. Supa basst do dazu a Vokuhila-Frisur. Manche Junga ham de jetzt eh scho wieda, is mia gsogt woan.
Beliebt ist in dem Joahr a des Wäidoi, oiso Stern, de Sonn und da Mond. Oda wia war`s glei mit an ganzn Planedn?! Da E.T. war aa wieda amoi wos, wei de Außerirdischen spuin ja jetzt in de Medien wieda endlich a große Roin, seid ma bei de Amis mehrere unbekannte Flugobjekt vom Himme ghoid hod.
Mei und dann losn se de Faschingsnarrn a imma wieda gern vo Film und Fernsehn inspirieren. Wenns heia auf wem dreffts, der ganz blau im Gsicht ist, is dem net etwa schlecht, nas der is Fan vom Film Avatar. Und wenn wer schwarz ozong is und se a no a weng komisch bewegt, dann is der ned in Traua, sondern wui de Wednesday von da Adams-Family nachspuin, wei vor dera hods jetzt aa a neie Serie auf Netflix gebn.

Jetzt woids ihr natürle a no wissn, ois wos i mi heia verkleid. I varate`s Eich: I bleib bei dem, wos i bin, de Stodttaubn Roselinde. So gfoi i ma am bestn. Vielleicht häng i ma no a boh Luftschlngn um. Aba dan muas langa.

Bis zum nächsten Moi
Eire Roselinde

Neues von der Roselinde

von Karin Wunsam | 29. Jan. 2023 | Heimat, Pinnwand

Griaß Eich liabe Leid!

So, ètz bin i wieda duach mit de Schlogzeiln fia den heitign Dog. I muas scho song, diam fuit ma si do noch am lesn tatsächle a weng easchlogn. Weil, wos Scheens taucht do ja grod ganz seldn auf.

Aufkemma is des Wort „Schlogzeiln“ übrigens um 1880 herum. Des Wort „Schlog“ deaf ma a ned so ganz wörtlich nema – vo zuaschlogn kimmt des natürle ned, sondan ma verstäht darunta eha so wos wia treffend.
Mit a boar Worte soi beschriebn wearn, um wos in so an Artikl eigentle geht.
Des is a gar ned so leicht, des kon i Eich ois Ogstäite bei an Presse-Portal sogn. Und dann woi ma natürle mit dera Schogzeile a no erreiche, dass die Menschn dann a den ganzn Artikel lesn und ned glei wieda weiterbladln oda scrolln. Sonst war ja unsa ganze Arbad umsonst, oda!?

Und leida is hoid so, dass a negative Schlogzeiln fui mehra Aufmerksamkeit kriagt, wia a positive.
A Übaschrift wia beispielsweis „Mei is heid des Weda schee“ interessiert doch kam jemanden. Aba wenn dann heid wieda a paar Zeitunga und Online-Portale in Bayern meidn, dass do a Schneewoizn auf uns zuarollt, dann bringt des auf alle Fälle vui mehra Lesa.
Guad, wenn ma dann weida liest, weard aus da Schneewoizn ganz schnei eha a bissal a Schneefoi und der dann ja nur ganz drom auf de Berg – aba egal, glesn is woarn und des zählt.

Aba mia is des heid egal – i meid jetzt trotzdem „Mei is heid des Weda schee“. Des stimmt zumindest und ob des dann wear liest is mia jetzt grod a egal. I mach mi jetzt nämle eh glei auf zum Spaziaflug mit mein Taubnspezi Benne.

Bis zum nächsten Moi
Eire Roselinde