Innpuls.me

Neues von der Roselinde

von Karin Wunsam | 19. Juni 2022 | Heimat, Pinnwand

Griaß Eich!

Mei is des heid hoass!
Mia Taubn kennan ja wissenschaftlich betrachtet ned schwitzn. Aba des hoast jetzt ned, dass i ned a ins Schwitzn kemma ko. Und des is heid da Foi. Mia is`s heid eindeeitig a zua hoass, schwitzn hin oda hear.
Jetzt heng i scho seid Stundn in so oana Wasserschüssel auf da Terrassn vo Innpuls.me herum. Ab do drin ward`s jetzt a scho ganz schee warm. Vo Abkühlung konn ma do a nimma sprecha.

Oiso hob i mi jetzt amoi schlau gmacht, wos ma sonst no so macha ko, um mit dem hoassn Weda zrecht zua kema.
Ihr glabt`s ja ned, wos ma zu dem Thema aktuell ois in de Medien findn ko. Unglaublich, sog I Eich. Und do gibt`s Tipps, de konn i jetzt a ned so ganz ernst nema.

Beispui gefällig?
Auf oana Seitn hob i glesn, ma soiad se doch de Haar obschneidn. Ob des jetzt für Damen mit lange Haar de Lösung is, glab i ned. De san doch imma so stoiz auf eanane Mähne. Und i konn ma jetzt a ned die Fedan ausreißn. Mecht aj schließle ned mit an grupftn Suppnhuhn verwechselt warn.
Do kema dann ja scho zum zwoatn Ratschlag. Ma soi si nackad auf den Fliesnbodn im Bod legn. Ja, is für Eich Menschn möglich, aber hoid wahrscheinlich nur so lang, bis ned a andera aus da Familie des Bod benutzn mechad.

Dann hob i ano des gfundn. Ma soid se „Ice Ice Baby“ von Vanilla Ice anhören. Des hob i ma jetzt auf Youtube rausgsuacht und getestet. Oiso mia is jetzt no imma ned kühla woarn. Aba des Stickl macht a guade Laune. Aba bitte jetzt beim Ohearn unbedingt beachtn: Ned midtanzn, no ned a moi midwippn – ansonsen ward`s Eich ja no waermer.

Bis zum nächstn Moi
Eire Roselinde

Sie sehen gerade einen Platzhalterinhalt von Standard. Um auf den eigentlichen Inhalt zuzugreifen, klicken Sie auf den Button unten. Bitte beachten Sie, dass dabei Daten an Drittanbieter weitergegeben werden.

Inhalt entsperren

Weitere Informationen

Neues von der Roselinde

von Karin Wunsam | 5. Juni 2022 | Heimat, Pinnwand

Griaß Eich!

Heid is der Dog, andem i eigentlich ganz groß rauskemma soiad. Mi wundat jetzt nur an weng, dass i bis jetzt no überhaupt koane Geschenke kriagt hob. Ned a moa an Kuach hod`s geem. Do laffd doch wos ganz foisch oda?

Na, i hob heid ned Geburstdog und a koan Namensdog. Warum i mi dann feian lassn woi?
Ja, weil heid Pfingstn ist – und wos für a wundascheens, klugs, ja grazils Geschöpf spuit do a wichtige Roin? Genau mia Taubn natürle. Ohne uns war de ganze Gschicht ja damois ganz andas ausganga. Nix wars worn mit dem Pfingstwunda.
Guad, de Gscheidhaffal unta Eich wean jetzt glei wieda sogn, dass des ja so gar ned in da Bibl stäht. Do soidas nur a Brausn am Himme gem hom und koana Taubn.
Mir egal, i hoid mi do an des neue Testament und demnoch is da Heilige Geist in Form oana Taubn vom Himme oba kemma.
Immerhin san mia Taubn ja scho in da Antike für Sanftmut und Liebe gstandn, wei die Menschn damois denkt ham, dass wir frei san von ollem Bittern und Bösn. Guad, dass de gmoant ham, dass mir gar koa Gallenblosn ham, is jetzt wieda a andere Gschicht.
Auf alle Fälle is meiner Meinung nach höchste Zeit, dass mia an Pfingsten so richtig in den Mittelpunkt grückt warn. So wia an Ostan die Hosn. De kemman do doch dann a ganz groß raus.
Guad, Schoko- Taubn braucht`s jetzt a ned umbedingt. Aber zumindest a Geschenk wui i hom. Oda no bessa a Kuchastück- und des hoi i mia jetzt a.

Bis zum nächstn Moi
Eire Roselinde

Neues von der Roselinde

von Karin Wunsam | 29. Mai 2022 | Heimat, Pinnwand

Griaß Eich!

So a Feierdog ist scho a guade Sach, find i. Glei gar, wenn a so gschickt foid wia Christi Himmelfahrt. Do wearn aus oan gmiatlichn Dog glei amoi viere, wenn ma sei Urlaubslanung a weng gschickt ostäid.

Guad, jetzt konn ma im Foi vo Christi Himmelfahrt aa amoi darüba nochdenga, warum grod an dem Dog aa Vodadog gfeiat werd und Christi Himmelfahrt praktischer Weis oiwei auf oan Donnersdog foid. Während auf den Muadadog sofort wieda da Mondog kimmt. Ganz schee ungrecht.
Aba darauf woid i ètz gar ned hinaus.
Mia gehts heid um die Feierdog an sich. Mia Bayan hams do ja guad, wei mia ham de meistn. 13 an da Zoi. Berlin kimmt nur auf zehn Feierdog wie voi andere Bundeslända a.
Wens nach mia gangat, kanntn `s aba bei uns aa gern no mehr sei.
Und des waarad aa tatsächlich möglich. Wei eigentle is jeda Dog a Feiadog – zuamindest wenn ma noch den kuriosn Feiatogn gäd.
Am heitign Sonndog, 29. Mai, is beischbuisweise Dog da Büroklamma. Des konn i ja no vasteh, weil so a Büroklamma is scho a recht nützliche Eafindung.
Außerdem is heid aba a no da „Leg dei Kopfkissn auf den Kühschrank-Dog“. Oiso des ist dann doch scho a bisserl seltsam, oda?
Wois soiad des jetzt bringa? Entstandn ist dea schräge Brauch moi wieda in Amerika und nämlich zu Zeitn, wos no gar koane Kühlschränk gem hod,sondan Speisekammern. Und do hod man oamoi im Jahr sei Kopfkissn oda wahlweis a sei Kleidung in de Speisekamma glegt, wei ma gmoant hod, des bringt Glück.
Mei, kennt`s ja gern a probiern und wenns Eich wos brocht hod, kennt`s uns des dann a gern schreibn.
I glab jetzt an den Brauch ehrlich gsogt eha weniga – aber wenn ich dafür no an freia Dog meara kriag, sog i ned na.

Bis zum nächsten Moi
Eire Roselinde

Neues von der Roselinde

von Karin Wunsam | 15. Mai 2022 | Heimat, Pinnwand

Griaß Eich!

Wer vo Eich hod se gestern den Eurovision Song Contest ogschaut?!
I woid eigentlich ned, aber dann, nach a paar abendliche Cocktails im Gartn bei de Mädls vo Innpuls.me hob i mia des Spektakl dann doch ggem.
Zum Glück war i da dann scho nimma ganz nüchtern, weil für uns hod`s ja moi wieda zappendusta ausgschaut.
War aber eigentlich eh schoo klar. De Prgonosen vo de Buchmacha für unsan Malik Harris warn scho im Vorfejd ois andre ois guad. Und dass die Ukraine gwinnt, war a scho klar. ESC is hoid a imma a bisserl a Politikum.
Mei und da Harris ko se a a bisserl damit tröstn, dass er ja immerhin no sechs Punkte mit nach Haus brocht hod. Frieha is nämlich ganz schee oft vorkema, dass ESC-Beiträge koan oanzigen Punkt kriegt ham. Knapp 40 Moi war des ist die 65 Jahr der Fall.
Bsondas gwundat hob i mi gestern üba den Beidrog vo de Norwega. Die „Subwoolfer“. De san ois Wolf daherkemma. Dabei lautet doch oa wichtige Regel des ESC, dass koane Viecha auf de Bühne deafan, oiso zumindest koane lebendign. De Norwegischn Woif warn aba dann scho ganz schee lebendig, hob i gfund.
Aba ma moas jetzt scho song, des war jetzt ned da einzige tierische Beitrog in da ESC-Gschicht.
2008 is Irland mit „Dustin the Turkey“ auf de Bühne kemma. I hob Eich des amoi in Youtube gsuacht. Do schaut`s:

Sie sehen gerade einen Platzhalterinhalt von Standard. Um auf den eigentlichen Inhalt zuzugreifen, klicken Sie auf den Button unten. Bitte beachten Sie, dass dabei Daten an Drittanbieter weitergegeben werden.

Inhalt entsperren

Weitere Informationen

Da Dustin Truthahn hod dann leida den Einzug ins Finale ned geschafft. Die Woif aus Norwegn ham`s dagegn gestern immerhin auf Plotz 10 brocht – mit da so wichtign Lebensweisheit „Before the wolf eats the grandma, give that wolf a banana“ oiso frei übersetzt ins Boarische: So a Banan liegt ned so schwar im Mogn wia a saftiga Bron.
I find, nach dem Truthahn aus Irland und dene Woif aus Norwegn weards jetzt dann a moi Zeit für de Stodttaubn aus Rosenhoam. Singa konn i guad, wenn i davor a Schnaps gsuffa hob und vui schlechta wia desmoi konn´s für uns ja eh nimma wearn.
Jetzt muas i ma nur no a gscheits Liadl überlegn mit a soana tiefgreifenden Botschaft wie aus Norwegn. Aba do foid ma scho no wos ei bis zum ESC 2023.

Bis zum nächsten Moi
Eure Roselinde

Neues von der Roselinde

von Karin Wunsam | 8. Mai 2022 | Heimat, Pinnwand

Griaß Eich!

Bei uns in Rosenhoam ist seid Freidog endlich moi wieda so richtig vui los in da Stod. Grund is des Street-Food-Festival, oda wia mia in Bayern sogn, die „So-vui-Essn, bis ma- platzn-Meile“. Kocht ward do ois, wos zur Zeit im Trend is.
Mi und de Mädels vo Innpuls.me hod bsondas des Leberkas-Sushi interessiert – oise de neie Form vo japanisch-bayerischer Freindschaft. Mia ham des Leberkas-Sushi natürle a probiert. Do, so schaut`s aus:

In da Mitt war a Stickl Leberkäs, drumherum a Reis und des Ganze ham`s dann eigwickelt in a ogrösts Algnbladl und mit Senft verziert. Des hört se jetzt vielleicht a bisserl seltsam o, hod aba gar ned so schlecht gschmeckt.
Ois weidere Neiheit angekündigt war a Eis mit schwarza Kohle. Ois ma des dann gfundn ham, warn mia fast a bissal enttäuscht, weil ned des Eis war schwarz, sondan die Waffe und de hod jetzt a ned anders gschmeckt wia a normale Eiswaffe.
Aba mei, des is ja mid vui Trends a so. Imma muas irgendwos neis sei und ned ois ko se dann wirklich durchsetzn.
Regelrechte Entrüstung hod kürzle a Rezeptvorschlog aus England auf Twitter ausglöst, hod ma mia erzäid. Spaghetti mit Schinkn und Ananas, oiso quase Spaghetti Hawai. Do entweiht ma ja die italienische Küche, ham de User geschimpft. A Twittara hod des sogar ois „Kriegserklärung“ an Italien verstandn und bat de Italiena darumglei amoi um Verzeihung und Zurückhaltung.
Mei, de Geschmäcka san hoid verschiedn. Nei in dem Joar is beispielsweise a no Kaffä oda Kaba mit so vitale Schwammerl drin. „Magic“ versprechen de Herstella. Kimmt jetzt drauf o, wos für Schwammerl de jetzt do hear neman, moan i.
Auf olle Fälle bleib i liaba bei de Sachan, de i kenn. So a boarische Leberkas-Semme schmeckt imma.

Bis zum nächstn Moi
Eire Roselinde

Wochenrückblick der Roselinde

von Karin Wunsam | 1. Mai 2022 | Heimat, Pinnwand

Griaß Eich!

Habt Ihr heid aa so an Stress?
Bei uns in Bayern is heid so vui los wia scho ganz lang ned mehr .
Wei an dem heitign 1. Mai woins jetzt olle ois nochhoin, wos hoid in de vagangane zowa Joahr ned mehr ganga is, wega dem Corona.
Mit dem 1. Mai is aber sowieso so a Sach. Für mi hod der Dog ja a Persönlichkeitsstörung. Auf da oana Seitn weard do laud protestiert und gschimpft und auf da anderen Seitn lustig gfeiert. Scho a weng seltsam, oda!
Bei de streitbaren Gwerkschafter war i heid scho zum Bsuach. Guad vom Protest hob i jetzt do ned so vui mitgkriegt. Ich konn Eich egentle nur erzain, dass des frische Popcorn bei dene, des eigente füar de kloana Gäst bedacht war, guad gschmeckt hod, mia und meiner Kollegin Josefa vo Innpuls.me
Danoch is für uns natürle no weidaganga zum antiken Trödelmarkt. Do war die Stimmung jetzt a ned ganz so ausglassn, weil hoid des Weda heid ned ganz so guad mitspuit. Späta woin mia vielleicht no a bisserl zum Maifest in da Vetternwirtschaft geh. Moi schaun.
Insgesamt is des Angebot bei uns in da Stodt aba am heitign Dog dann doch noch eha überschaubar.
Anders schauts do bei uns auf`m Land aus. Do wern heid so vui Maibäum aufgstäit, dass ma scho fast den Übablick darüber valiad, wer wann wo.
Bsondas eifrig war heia übrigens a Gruppe Holledauer. Die ham ganze sechs verschiedene Maibäum zusammenklaut. Und wos ma so gheard hod, hams dann mit dem Bewacha vo eanana Rekord-Beute ganz schee vui zum doan ghabt. I mecht ma jetzt gar ned vorstäin, wos de heid olle für an Rausch hoam bringan, wenn`s dann glei 6 Moi auf an neia Maibaum ham ostoßn miassn.
Des war mia dann doch zvui. Do loß i den Maifeierdog dann doch liaba a bisserl ruhiga ogeh. Gibt ja no andere Bräuch, de mit dem 1. Mai zamhengan und a schee san.
A ganz a scheena Brauch is aba leida im späten 20. Jahrhundert wieda verlorn ganga – da Maikorb. Den hod ma früha mit Siassigkeiten und Bluma gfuit und seine Nachbarn unerkannt vor de Tür gstäit.
I find des kannt ma doch wieda einführn. Wos moants Ihr?

Bis zum nächstn Moi
Eire Roselinde